Dec 31, 2011

كل سنة و انتم طيبيين

  كل سنة و انتم طيبين بمناسبة سنة جديدة عدت علينا.. يا ريت تكون السنة اللي فاتت في عينيك حلوة علشان تقدر تشوف السنة الجديدة كمان حلوة و يا رب تقضوا الليلة مع اللي تحبوه و تكونوا بتعمله اللي بتحبوه

سنة مختلفة

مش مقتنع ابدا ان سنة 2011 سنة وحشة و زي ما شايف معظم الناس عندي علي "الفيس بوك" و غيره بيقولوا... انا مش مقتنع اساسا ان في حاجة اسمها سنة وحشة و سنة حلوة لان ربنا دائما بيجيب كل حاجة حلوة بس يمكن احنا اللي مابناخدش بالنا

السنة دي كانت مختلفة و حدثت فيها احداث كتير حلوة رغم اننا ممكن نبقي شايفنها سودا... اخواتنا في تونس الهمونا و الهموا العالم كله و خلوا الظالم اللي عندهم يجري و يخلع.. و من بعدهم احنا في مصر اقتنعنا ان مفيش حاجة مستحيلة و طالما مع بعض في كيان واحد يبقي مفيش حد هايقف قدامنا. و من بعدنا العالم العربي و العالم كله

السنة دي غيرتني شخصيا و غيرت فيا حاجات كتير و خلتني اشوف الدنيا و الامور و الاحداث بنظرة مختلفة... علمتني حاجات عن نفسي مكنتش اعرفها.. حبيت فيها و لاقتني فاهم نفسي غلط و فاهم حاجات كتير غلط

كل سنة بتبقي مختلفة و ماتمناش غير ان السنة الجديدة دي تبقي مختلفة زي 2011

افرحوا بالسنة الجديدة.. افرحوا و اشكروا ربنا ان سنة عدت عليكم و انتم بخير و ادعوه تبقي السنة الجديدة مليانة خير ليكم و لكل الناس اللي حواليكم... ممكن تصلي ركعتين و بعدين تخرج و تفرح و تقضيها مع اللي بتحبهم مش شرط تعمل حاجة واحدة منهم

Dec 30, 2011

هو الدين بيقول ايييه؟

الشعب المصري للاسف بيحب يضحك عليه بمزاجه. هي مشكلة في كل شعب و كل شعب بيضحك عليه بطريقة معينة.

مرة من حوالي سنتين او اكتر كنت انا مع 2 مصوريين بنصور علي خط سكة حديد و كان قدامنا علي مسافة في العامل اللي بيبقي بايت ده (زي فيلم طيور الظلام كدة) و اول ما ابتدينا نصور و الفلاش يضرب لاقينا الراجل جي علينا و علي وشه غضب ربنا. مصور من اللي كانوا معانا قالنا انا هاتكلم محدش يقول حاجة و اول ما الراجل وصل و انتوا فين و التصاريح و الكلام ده راح المصور ده قايله احنا في كلية فنون جميلة و انا بعمل مشروع التخرج. في اللحظة دي الراجل اتغير 180 درجة و صوروا براحتكم و اعملكم شاي.....

المصور ده قال بعدها حاجة انا لسة فاكرها كويس.. ان المصري و عمتا الاب و الام شايفين ان الدراسة اهم حاجة في الدنيا و البني ادم من ساعة ما يتولد لحد ما يموت لازم يبقي بيذاكر علشان كدة لو بتعمل اي حاجة في سبيل المذاكرة هايسبوك تعملها... دروس, كورسات و الذي منه اللي احنا عارفينه ده و المشكلة انهم بيبقوا في معظم الاوقات عارفين ان ممكن يكون بيضحك عليهم بس بيفوتوا بمزاجهم.

المشكلة بقي في اللي بيضحك علي الشعب باسم الدين و ربنا سواء مسلم او مسيحي او يهودي.. بس انا هاتكلم علي اللي انا عارفه علي ديني انا علشان محدش يقولي انت بتتكلم في اللي مالكش فيه بس الكلام عمتا مش علي الدين اكتر منه علي طريقة تفكير شعب.

احنا بطبعنا شعب متدين من ساعة الفراعنة و ما قبلهم و لحد النهاردة و ده شئ كويس طبعا مفيش احسن منه.. بس احنا في مصر عندنا الـ3 اديان السماوية اللي انا اعرف عنها كويس و اعرف انها بتدعوا ان الواحد يفكر في الخلق و يستخدم عقله و مايبقاش زي اجدادنا بيعبد الاصنام او المخلوقات اللي زينا سواء الشمس او القمر او غيره من خلق ربنا.

للاسف اللي انا شايفه اننا وصلنا لنفس المكان دلوقتي تحت مسمي الدين و سلمنا عقولنا و قلوبنا لناس بتضحك علينا باسم الدين و مش عايزانا نفكر ولا نشغل عقلنا.. عايزانا نمسك سيوف و نمشي نضرب اللي مش عاجبه دينا سواء احنا مسلميين او مسيحيين طالما اللي قدامنا مش من نفس دينا و طالما مش عاجبه دينا يبقي مايستحقش انه يعيش و الاسم اننا بندافع عن دينا.

 يتقالنا صوتوا بكذا او بكذا علشان الشيوخ قالوا كذا و الشيوخ دول علماء الدين و الدنيا و مفيش حد احسن منهم.. و نسيوا ان نبينا سيدنا محمد عليه الصلاة و السلام كان الصحابة و اللي حواليه بيناقشوه مش لانهم مش هاينفزوا كلامه ولا لانهم شاكين فيه لكن لمجرد ان من اساسيات الاسلام اننا نفكر و نستخدم عقلنا اللي وهبنا بيه الله عن باقي المخلوقات.

نسيوا ان في عصر كان فيه شيوخ و علماء احسن من دلوقتي مليون مرة كانوا بيقضوا حياتهم في التفكير و دراسة الدين و الشريعة علشان يوصلوا لافكار و حلول لبعض المسائل.. مش مجرد انهم سابوا دقتهم تطول و اتكلموا كام كلمتين بالفصحة بقوا علماء دين و دنيا و المفروض امشي ورا كلامهم و انا مغمض و لو اتكلمت عليهم ابقي ازاي كدة بتكلم علي ناس احسن مني و الكلام اللي احنا بنسمعه ده.

الكلام ده ممكن مايقدمش اي جديد و ممكن اصلا و ده الاحتمال ان معظم اللي هايقراه هايبقي اصلا فاهم اللي انا بقوله ده كويس بس عمتا انا حابب اوضح الموضوع بحاجة قريبة منه و مش في مصر خالص.

اللي يعرفني شخصيا يعرف اني سافرت سنة الاسكا في برنامج تبادل ثقافي.. ده مش مهم, المهم ان في امريكا عمتا عندهم برده ناس تقابل الشيوخ اللي عندنا دي و بيضحكوا برده عليهم باسم الدين و باسم الله لاغراض مختلفة علشان الشهرة و علشان الفلوس و غيره و السبب مش مهم اكتر ما ان ازاي هو اللي اهم.

بداية لما الواحد يبقي عايز يقنع اللي قدامه باي حاجة لازم يحاول الاول يخليه يثق فيه و يحبه و دي مفيش اسهل منها في الشعب المصري لاننا اصلا قلبنا قلب خساية و عواطفنا اقوي مافينا و ده هو هو اللي كان بيلعب عليه خطابات مبارك الاخيرة و اللي فعلا اثرت في اغلبية الشعب و انا منهم.

تاني حاجة انه يقولك الكلام اللي انت عايز تسمعه و اللي هو بيبقي في البداية ازاي احنا بعاد عن ربنا اوي و ازاي الواحد هايتعذب و النار و عذاب القبر و غيره و غيره لان احنا كمصريين رغم اننا المفروض متدينين الا اننا مابنعملش اي حاجة من اللي الدين المفروض يقول عليها غير اننا بنصلي و نصوم فالبتالي احنا عارفين اننا بعاد عن ربنا و الكلام ده اي واحد بيضحك علينا بيه لحد ما نعتقد خطأ انه الحل هايبقي علي ايديه باذن ربنا لان ده عالم من علماء الدين و هو اللي جي ينقذنا.

بعدها طبعا نيجي لاهم نقطة و هو انه يقولك و يفهمك انه علشان هو صح و انه بيتكلم كلام ربنا و انه و انه و انه ان الناس بتحاربه و اعداء الاسلام بتحاربه و امريكا عندها مخططات علشان تغتاله و امن الدولة المنحل الغير منحل عنده زنزانة محندقة كدة باسمه و كل ده ليه؟ لان هو صح و لان الناس دي كفرة اعداء الاسلام.

بكدة هو ضحك علي عقلك و علي قلبك و بقيت شخشيخة في ايده و اي حاجة يقول عليها بعد كدة بتبقي صح.

و طبعا الناس اللي زيينا او المفكريين او اللي مابيقتنعوش بكلامه بيبقوا علمانيين و ليبراليين و ملحدين الي اخره...

الكلام في الموضوع ده يطول و مش عايزها تقلب كلام عن الدين و ابقي انا كمان من اعداء الاسلام الليبراليين العلميانيين الملحدين :)

Dec 29, 2011

بداية


كل مرة كنت بفكر اعمل فيها مدونة كانت بتبقي لاسباب غلط او غلط بالنسبة لي دلوقتي سواء كانت موضة او كان كل غرضها اني ابقي بعمل حاجة تجذب الناس. المرة دي انا توصلت ان المدونة هاتبقي بالنسبة لي مش اكتر من مكان بكتب فيه اللي انا عايزه, حاسه, او بفكر فيه لان الانسان مش اكتر من كل الحاجات دي و اهو الواحد لما يحصله حاجة يبقي في جزء منه عايش بجانب اعماله في الحياة.
هاكتب فيها اللي انا عايز اكتبه بجد بعيدا عن محور شغلي (انا لسة طالب عمتا) اللي هو الجرافيك و الويب ديزاين لان ليها مكان تاني غير هنا و مش موجهة لاي حد بل موجهة لناس معينة بتهتم بالموضوع ده و هابقي اقولكم علي مكانها بعدين. و السياسة او علي الاقل هاحاول تكون السياسة جزء بسيط منها اوي مش لاني ماليش فيها او لاني خايف بس فكرتي بتتمحور ان في ناس كتير احسن مني في السياسة و في مواقع و مدونات كتير بتتكلم في السياسة و انا مش عايز فكرتي تبقي اساس ان حد يفهم حاجة غلط او يكون فكر سياسي عن طريقي و انا علي قدي فيها.

في 3 انواع من الناس عمتا لما هاتقرا الكلام ده هاتسال سؤال معين..
النوع الاول و هما حزب الكنبة و دول غالبا الكنبة بالنسبة لهم هي محور حياتهم و مش هايفكروا ابدا انهم يدخلوا المدونة دي او يقروا اي حاجة. النوع ده ماليش علاقة بيه غير اني ادعيله ربنا يهديه.

النوع التاني و هما الفلول و احباب الاخوان و السلفيين و دول كل اللي هايبقي في دماغهم هل انا عبيط و بيضحك عليا ولا لا و للاسف الاجابة هاتبقي لا مش عبيط ومش بيضحك عليا (علي الاقل انا فاهم كدة) و مش هاخلي اي حد مهما كان انه يفرض رأي عليا مهما كانت الاسباب و الدوافع او الاسماء و ارجوا ان مايكونش في تعليقات سخيف منهم مالهاش اي لازمة..لو عايز تنصخ اصح بالحسنة و لو مش عاجبك كلامي يبقي محدش ضربك علي ايدك علشان تقراه او تكمل في قرايته و امشي بالحسنة برده.

النوع التالت و ده اهم نوع بالنسبة لي و هما الناس العاقلة المفكرة المحترمة و اللي ممكن فعلا يكونوا هما النوع الوحيد اللي هايدخل المدونة علي الاقل من حين الي اخر. و دول اول سؤال انا شايفه هايدور في دماغهم او عمتا لازم انا اجاوبه الا و هو "انت من شباب الثورة او مع الثورة؟" و الاجابة المنطقية هاتبقي طبعا, انا كنت اول واحد نادي بالثورة... بس ده مش حقيقي.

علشان اجاوب علي السؤال ده يبقي لازم نعرف معني شباب الثورة بالنسبة لهم.
لو معناه اني كنت من اول المشاركين في الثورة و اسقاط النظام يبقي لا انا مش من شباب الثورة.
لو معناه اني نزلت شاركت في اي حدث مهم من احداث الثورة (غير اللجان الشعبية طبعا) يبقي برده لا انا مش من شباب الثورة.
الحقيقة اني اول ايام الثورة كان مضحوك عليا زي ناس كتير.. و في اول خطاب لمبارك اتأثرت فعلا و يمكن كنت ضد الناس انها تقعد في التحرير و كنت بقول ادوله فرصة و الكلام ده.
كل اللي أقدر اقوله اني دلوقتي اتغيرت او بمعني اصح فهمت اكتر من الاول و نظرتي للأمور اتغيرت بس ده مش معناه اني بقيت من شباب الثورة لان شباب الثورة اللي بجد هما اللي ضحوا بحياتهم في سبيلها.. هما اللي شاركوا في كل الاحداث.. هما اللي بفضلهم انا مابقاش مضحوك عليا.


معلش لو الكلام كتير و معلش لو طريقة الكتابة باللغة العامية المصرية مضيقاك و انت بتقرا لانها بتبقي في الغالب اسهل في الكتابة منها في القراية بس دي اكتر طريقة اقدر اعبر فيها عن اللي جوايا و برده هايبقي في كلمات مش هاعرف اعبر عنها غير بالفصحة.
UA-37864249-1