Jan 7, 2012

الجزء الاخير من اليوم

مهما بكون متضايق او مخنوق او في حاجة في دماغي مابتبقاش في حاجة تنسيني كل ده و تخليني ارجع طبيعي تاني غير الليل. تقريبا من   3 اعدادي كدة ابتديت اني اسهر للصبح و انام الصبح و اصحي علي المغرب و هكذا زي ما شباب كتير بيعملوا يعني... انا معرفش ليه احنا بنعمل كدة او هو كل واحد زي التاني ولا لا بس انا اقدر اتكلم عن نفسي.

بليل الدنيا كلها بتسكت و ده اللي كله عارفه بس الحقيقة ان لا الدنيا مابتسكتش لكن المخلوقات اللي بتبقي عاملة دوشة هي اللي بتسكت.. الحياة بتقف لكن من الحياة الحقيقية.. الحياة اللي احنا عملناها بمشاكلها و بحلوها و مرها. ربنا سبحانه و تعالي خلق النهار و الليل و قال ان النهار هو وقت الشغل و الحياة و المعاش و الليل للراحة و ناس كتير هاتقول ان دي سنة الحياة و ان ربنا خلقنا كدة و ماينفعش نخالف النظام لكن انا مش بتكلم من ناحية دينيا لاني معرفش و مش هافتي لاني مش مقتنع بكلام الناس ده و الكلام فيه دينيا هايطول.

عن نفسي لما الدنيا بتسكت و اغلب الناس بتنام بحس براحة نفسية لاقصي درجة... الدنيا هدوء مع انها مش واقفة وفي مخلوقات كتير صاحية و في مصالح كتير دايرة لكن كل ده داير في هدوء و سكينة و جمال. يكفي ان في ليلة شتا زي النهاردة تقف بس في البلكونة (ده لو مش ساكن في الابراج اللي لازقة في بعض دي و مش بتشوف حاجة اصلا) او في الشباك في عز البرد الساعة 3 بليل و يبقي القمر بدر منور الدنيا بنور خفيف جدا يحسسك بالدفا في عز البرد.. مش شرط القمر يبقي رومانسية و حب. القمر مش بتاع الحبيبة و بس لكن القمر بيريحك نفسيا و بيثير جواك المشاعر و ينبهها سواء حب لشخص معين او حب لربنا و جمال و عظمة خلقه او ان عايز تبقي حاجة معينة و تنجح او انك بتفكر في بكرة الي اخره.

الليل و الهدوء و القمر و الهوا و النجوم و السما زيها زي الصبح و الشمس.... مهمة جدا لينا و مهمة للحياة عامة و مش زي ما الناس فاكرة ان العجلة بتقف بليل (مش عجلة الانتاج يا بتوع الكنبة) لكن كل ما في الامر ان عجلة مختلفة هي اللي بتدور بليل... بالنسبة لي ماينفعش ليل من غير صبح و ماينفعش صبح من غير ليل.

Jan 6, 2012

انت أنبوبة

الـYOUTUBE شئ مهم في حياتنا و منقدرش ننكر ده. سواء كنا بنتفرج علي افلام او حاجات مضحكة او حتي فيديوهات سياسية. من غير كتر كلام انا قلت اقول علي شوية من الـChannels اللي انا subscribed ليها علشان لو حد مهتم :)

نبتدي كدة بحاجة سخنة شوية و مع بريتني سبيرز :D 
و فيديو علي السريع 
و ايوة بحبها :)

نيجي لبعد كدة و مع college humor
و لو كنت ماتعرفش ايه ده يبقي انت مش عايش و فيديو علي السريع برده


معانا بعد كدة Smarter every day و ده واحد بيعمل فيديوهات علشان ياخد تبرعات او فلوس يعني علشان يدخل ولاده جامعة كويسة و الفيديوهات اللي بيعملها اصلا عاملة زي كلية بالنسبة ليا علشان بيقول فيها حاجات الواحد مايعرفهاش بطريقة تخليك تستمتع بيها.
و فيديو بسرعة


اللي بعد كدة في HAK.5  ده برنامج اسبوعي عن التكنولوجيا و الـHacking و ده كان من اوائل البرامج اللي بتابعها و اللي شدني جدا و علمني حاجات كتير.
و فيديو



و بعدين معانا Household Hacker و دي فيديوهات معمولة علشان حاجات صغيرة ممكن تعملها في البيت بحاجات بسيطة و تعمل منها حاجات ممتعة او ساعات مؤلمة :)
و فيديو برده


بعد كدة معانا Latuff  و مين فيكي يا مصر مايعرفش هو مين دلوقتي و مع ان فيديوهاته قليلة الا انه يستحق المتابعة
و.... ايوة فيديو :)


مروان انور... لو ماتعرفوش يبقي فاتك كتيييييير اوي
عييييييش


و بعدين مشروع ليلي..... اااااه يا مشروع ليلي... لو هاتكلم عن حاجة واحدة عملتها في 2011 و نفسي اعملها كل يوم هايبقي اني احضرلهم حفلة..
و فيديو برده


و بعدين معادنا مع علوم القتال.. حتة نات جيو بقي Submissions 101 فيديوهات عن الجيوجيتسو
فيديو (ليس للقلوب الضعيفة :) JK )


و علشان انا في تجارة انجلش يا مي... لازم نبقي عارفين ست سوزان (مش سوزان القراءة للجميع) مع انها بطلت تعمل فيديوهات بس الست دي افضالها كتير عليا و علي كتير مننا في الدفعة
فيديو


يحصل ايه لما يبقوا شباب مجانيين (زيي كدة) و معاهم كاميرا تصوير بطئ (تصوير بطئ بجد مش بتاعت الافلام الهندي دي) يبقي معانا the Slowmo guys
فيديو كالعادة


طبعا انا لا يهمني بتاتا انكم تتفرجوا علي اي حاجة خالص بس قولت اهو اعمل خير و ارميه في البحر :D

Jan 2, 2012

مهندس ولا دكتور؟

في مقولة انا مش عارف اصلها ولا مين اللي قالها بتقول "حب ما تعمل حتي تعمل ما تحب" و اكيد الاغلبية عارفاها من فيلم مطب صناعي. المهم ان المقولة دي بالنسبة ليا غلط و الصح هو عكسها.. اعمل ما تحب حتي تحب ما تعمل.

في ثقافتنا من زمان اوي و الواحد لما بيتولد بيبقي عليه ضغط انه لازم يطلع يا دكتور يا مهندس.. ساعات بتبقي علشان الاب او الام عايزين يحققوا حلمهم في ابنهم او بنتهم و ساعات اكتر بيبقي لانهم شايفين ان ده احسن حاجة بالنسبة لك و في الحالتين بيبقوا علشان بيحبوك و شايفين ان دي مصلحتك. كل ده مايمنعش ان التفكير ده غلط و الغلط الاكتر انك تستمعلهم و تعمل اللي هما عايزينوا.

الانسان الناجح بجد هو اللي بيعمل الحاجة اللي هو بيحبها و اللي هو كويس فيها و عمرك ما هاتكون كويس في حاجة لو بتعمل حاجة مابتحبهاش و لو عملت زي ما المقولة الاصلية بتقول يبقي هاتكون بتخدع نفسك علشان تعرف تعيش و تمشي في الساقية زي ناس كتير اوي عايشين مش طايقين شغلهم و لا حياتهم كلها.

انا طبعا مش بعيب علي المهندس و الدكتور.. في ناس فعلا بتبقي عايزة الحياة دي و دورهم مهم جدا في حياتنا لكن لو انت دخلت الكلية علشان بابا او ماما عايزينك تدخلها يبقي انت عيشت نفسك في مكان مش مكانك و عمرك ماهتبقي سعيد فيه و كمان اخدت مكان واحد كان ممكن يكون محتاج مكانك و بيحبه.

لو عايز تبقي دكتور او مهندس علشان عايز فلوس و هدفك الفلوس و شايف ان ده اللي هايسعدك يبقي اسمحلي اقولك انك غلطان لان الفلوس عمرها مابتكون هدف علي اد ما هي جايزة علي النجاح يعني انت لو ناجح هايبقي معاك فلوس و عمرك ماهاتبقي ناجح غير لو كنت سعيد او حتي لو كنت مش سعيد بس معاك فلوس تبقي لازمتها ايه؟

لو عايز تبقي مهندس او دكتور علشان يبقي شكلك محترم قدام الناس فبرده انت غلطان لان الاحترام عمره مابيكون بالكلية او الوظيفة لان هتلاقي واحد مش متعلم ممكن يكون محترم و دكتور او مهندس مش محترم في عين ناس كتير.

لازم الانسان يختار حياته... خدد نصايح من بابا و ماما لكن ماتاخدش اوامر في حاجة تخص حياتك و مستقبلك مش لان هما غلط او صح لكن لان دي حياتك و انت اللي هاتعيشها و انت اللي هاتبقي مسئول بعد كام سنة عن نفسك عن نجاحك او فشلك. خلي في دماغك ان اللي انت بتحبه او كويس فيه هاتعرف توصل فيه لاقصي درجات النجاح في حياتك المهنية و في حياتك الشخصية. الناس كلها عمرها ما هاتكون زي بعضها فاوعي تقع في مصيدة الروتين الثقافي بتاعنا.... و خلي الموضوع ده في دماغك لحد ما ربنا يكرمك و تخلف و حاول تعلمه لابنك او بنتك و تتكلم معاه في اللي هو عايزه و تنصحه لكن ماتخدش انت قرارات نيابة عنه خليه هو اللي يختار حياته.

محدش هاينفعك او هايفيدك الا نفسك و محدش هايضرك الا نفسك يبقي محدش ياخد قرارات نيابة عنك و يعيشك حياة مش حياتك.

Jan 1, 2012

السعادة

في كتاب "كتاب مالوش اسم" لأحمد العسيلي" الطبعة السابعة صفحة 79 بيقول "المقصود يعني ان النظرية اللي انا مصدقها جدا, هي انك لو مش سعيد تبقي حمار بغض النظر عن التفاصيل ايا كان اللي بتعمله او مابتعملوش"

الحقيقة قعدت افكر فيها كتير لاني فعلا ساعات كتير بحس اني مش سعيد. لما فكرت فيها اكتر لاقيت اني فعلا عمري مكنت حزين او عايش و خلاص حتي لو كنت بحاول اوهم نفسي بكدة. ساعات كتير اه كنت بتيجي عليا حالة اني افضل متضايق و قاعد في البيت بس السبب دائما كان بيبقي اني خرجت عن احلامي و اهدافي فحسيت اني حزين و لما ببقي في "فترة عدم السعادة" كل اللي بيحصل اني براجع نفسي تاني و بفكر نفسي اني مهما كان لازم ابقي سعيد و لما ببعد عن الناس الفترة دي بيبقي لاني عايز اراجع نفسي علشان ارجعلهم سعيد او عادي.

حتي لما ببقي مكشر و زعلان بيبقي لاقني بحاول افكر في حل يخرجني من الحزن و يخليني سعيد و الحل ده بيبقي اني ارجع لاهدافي و اللي عايز اعمله في حياتي اللي بيخليني سعيد مهما كان حصل من ظروف تخليني ابعد عن الاهداف دي.

الفكرة هنا ان فعلا اللي مش سعيد بيبقي حمار لانه هو اللي مش عارف يسعد نفسه او فاكر ان السعادة في حاجات معينة و بيبقي غلطان... فكروا مع نفسكم كدة هتلاقوا ان الكلام ده فعلا حقيقي. لو مش سعيد تبقي انت اللي غلطان.. و تبقي غلطان اكتر لو معرفتش تخلي نفسك سعيد.

الترحال

مش هاتكلم عن الدين ولا ايه السبب من وجودنا ولا الكلام ده لان ده كله عارفه. انا هاتكلم عن حقيقة الحياة من ساعة ما اتخلقنا لحد دلوقتي و اللي انا بجد مش قادر اعرف ازاي في ناس عايشة من غيرها.

من اول سيدنا ادم و الانسان عايش علي الترحال و السفر و الاكتشاف. بدأ بعد نزول سيدنا أدم و سيدتنا حواء من الجنة الي الارض و بدء رحلة البحث عن بعضهم و بعدين الانسان البدائي و الترحال وراء الحيوانات علشان يعيش و حتي بعد ما الحضارات العظيمة زي الفرعونية عرفت الزراعة و الاستقرار مكنش استقرار برده كان في حاجة للبحث و الترحال و علشان كدة كانت اي حضارة بتتوسع لان كان في ترحال و كان في دائما بحث عن جديد.

في ناس بتعيش حياتها كلها عايشة في مدينة واحدة او حتي لما بتسافر لأجازة او في الصيف مثلا بتبقي لاماكن معروفة و راحوها قبل كدة. بالنسبة لي مفيش اجمل من ان الواحد يسافر او يروح اماكن جديدة و يشوف ثقافة جديدة كل فترة. ماتقوليش مفيش فلوس او وقت او او او لان مش لازم يكون الموضوع مكلف يعني مش لازم تسافر برة بلدك لان اكيد في اماكن جوة بلدك اكيد عمرك ماروحتها ولا تعرف عنها اكتر من اللي كل الناس تعرفه. احنا كمصريين بنعيش حياتنا كلها من غير ما نزور حاجات كتير في مصر مع ان بعضنا بيبقي متلهف انه يسافر برة علشان يشوف العالم و بينسي المكان اللي هو عايش فيه.

يمكن فعلا في ناس بتخاف من المجهول او السفر و الترحال مش بيبقي علشانهم لكن ده اللي هم بيخلقوه جواهم لاننا جزء من اصلنا و جزء من انسانيتنا هو الترحال.

الترحال غير السفر او غير الاجازة. الاجازة او انك تسافر بتبقي بتدور علي انك تعيش نفس حياتك لكن في مكان مختلف فبتدور علي فندق كويس و غالبا بتدور علي نفس الاكل و نفس حياتك التقليدية لكن في مكان مختلف. الترحال الحقيقي هو انك تعيش المكان في المكان بمعني انك تبقي في مكان جديد لكن تعيش ثقافته الحقيقية و تتعلم عنه و تعرف عنه حاجات غير اللي السياح يعرفوها او بيروحوها.

انا بحاول اني اعمل ده و كل مرة هاعمل حاجة زي كدة هاكتب عنها هنا و لو انت عايز تعمل كدة و مش عارف تبتدي منين خليني ادلكم علي حاجة انا بعتبرها من احسن حاجة في الموضوع ده في مصر الا و هي مجموعة او جروب رحالة و دول مجموعة بتحاول تنشر ثقافة الترحال في مصر سواء محليا او دوليا. الموضوع مش رحلة بتشترك فيها و تطلع باتوبيس و مشرف.. كل الموضوع انهم بيوفرولك بيئة فيها ناس بتحب اللي انت بتحبه فممكن تشاركهم مغامرة جديدة و كمان معلومات عن اي حاجة تهم الرحال الحقيقي. بيبقي في رحلات استكشافية صغيرة جوة القاهرة نفسها و اللي برده حتي لو انت من القاهرة 90% ممكن ماتكونش تعرف عن الاماكن دي او روحتها قبل كدة. ممكن تشوفوا الجروب ده علي الفيس بوك من هنا 

و عامة حاول انت تدور علي مكان جديد تروحوا و تعيش تجربته بجد هتلاقي نفسك و هاتتعلم كتير.

لو كنت تعرفني بجد

 في برنامج بتفرج عليه بيجي علي ام تي في ارابيا ... البرنامج باختصار بيجمع عدد من الطلبة في مدرسة معينة و بيتكلموا مع بعض عن طريق انشطة معينة علشان في الاخر يتوصلوا انهم كلهم عندهم مشاكل و كلهم اقرب من بعض اكتر مما هما مختلفين و بيتعرفوا علي بعض بجد من خلال الانشطة دي

انا عارف اني شخصيتي او طباعي فيها عيوب كتير و ده بيضايق ناس كتير حواليا. حاولت افكر في كل الحاجات اللي بتضايق ناس بس الحقيقة لاقيتها اكتر من اي اقولها هنا او اتكلم فيها فحاولت اجمع اكبر عدد او اكتر الحاجات اللي بتضايق الناس اكتر و يمكن حاجات في اللي هاقولها هنا محدش يعرفها و ممكن اكون ماقولتهاش لحد ابدا قبل كدة و يمكن واحد او اتنين بس هما اللي يعرفوها

ناس كتير حواليا بيتضايقوا اني زي ما بيقولوا "عارف كل حاجة" بس للاسف عمرهم ما بيركزوا اذا كنت فعلا كدة ولا بعمل نفسي عارف كل حاجة و الاسوأ من كدة انهم عمرهم ما بيلاحظوا اني ساعات كتير بقول "معرفش" و لو مش متأكد بقول اني مش متأكد.. بس كل ده مش مهم لاني مش بتكلم علي الناس انا بتكلم عليا انا فالمهم هو انا ليه كدة

و انا صغير يعني طول ابتدائي و اعدادي مكنش ليا اصحاب و لا كنت بقضي وقتي بلعب ولا بروح النادي و لا كنت بعمل اي حاجة من الحاجات دي لاني ساعتها ماكنتش بعرف اني اكون صحاب او يمكن انا اللي كنت ماينفعش اتصاحب :) المهم اني مكنتش بلاقي حاجة تتعمل غير اني اقرأ. الموضوع ابتدي طبعا و انا صغير اني كنت بقرأ مجلة ميكي و اللي لسة لحد دلوقتي بحبها بالرغم ان كتير اوي بيضحكوا عليا لما بشتريها بس الفكرة انها بتفكرني بايام زمان لما مكنش في حاجة في دماغي غير اني اضحك و بس و لما ابتديت اني اخلص المجلة في مفيش و كنت بجيب المجلد بخلصه تقريبا في نص يوم ابتديت ادور علي حاجة تانية اقراها و ماتخلصش بسرعة فابتاديت اجيب كتب.... 

ابتدت بكتب هابلة لحد كتب لسة عندي لحد دلوقتي و برده مش فاهم منها حاجة.. مكنتش بجيب عن حاجة معينة كنت بجيب عن التاريخ او العلوم او قصص او اي حاجة بتشدني في وقتها. و انا في 5 ابتدائي اشتركت في مكتبة مبارك العامة اللي في الجيزة في طريق الكتكات كدة و كنت تقريبا بروح كل جمعة اقرأ هناك و اجيب كتب و اجي و كان بيبقي معايا اصحابي كانوا اشتركوا معايا برده بس مرة عن مرة ابتدي الموضوع يقل ساعات نروح اتنين و ساعات اروح لوحدي... الممتع ان المفروض المكتبة 3 ادوار غير الارضي.. الاول كان كتب بجد و كان فيه مكتبة فيديو لكل حلقات العلم و الايمان بس مكنش ينفع ندخله علشان للكبار فقط ده الدور كله يعني.. و التاني للاطفال و التالت كان مكان عرض. انا كنت بعرف ازوغ و كنت بدخل الدور الاول ده يمكن علشان كنت طويل شوية فكانوا بيتخدعوا فيا :)

المهم و الغرض من الحكاية دي اني فعلا من و انا صغير علشان مكنتش بعمل حاجة تانية كنت بحب اقرأ و كنت بقرأ في كل حاجة علشان كدة ممكن ابان اني بتكلم في كل حاجة و عامل نفسي عارف كل حاجة بس ده مش صح انا بس مجرد اني بحب اعرف معلومات عن اي حاجة حتي لو مكنتش مهمة او مش جذباني لكن اني اعرف عنها هايفدني مش هايضرني. و ببقي متضايق جدا لما حد بيتكلم في الموضوع ده و بيقولي اني "طبعا عارف كل حاجة" بسخرية طبعا

الموضوع التاني اني ساعات بحب اعد في البيت... المشكلة ان معظم اصحابي او اغلبهم عندهم اخوات و بيبقوا متضايقين من البيت علشان كدة بتبقي اي فرصة ليهم انهم ينزلوا فبينزلوا.. انا وحيد و لازم اني علي الاقل يوم في الاسبوع اعد كدة بمزاج في البيت في اوضتي معملش حاجة او استمتع بس اني اكون مابعملش حاجة.. كتير اوي مابيفهموش الموضوع ده اني ببقي محتاج فعلا اني اقضي اليوم كدة علشان اعرف اكمل باقي الاسبوع

الموضوع اللي بعد كدة اني ببقي حيوان اول ما اصحي من النوم في العادي... ماببقاش طايق اي حاجة قدامي ولا عايز اتكلم و لا اي حاجة ببقي "مقريف يعني" و علشان ابقي عادي لازم يا اخد دش بمزاج كدة "و ده بيبقي صعب في اغلب الاوقات اللي ببقي نازل الجامعة فيها" يا اني اصحصح براحتي كدة مع كوب من النسكافيه او القهوة "السادة"  و بعد كدة ببقي عادي.. و مهما حطيت الموضوع ده في دماغي لازم حد بيزعل مني لاني مابعرفش اتحكم فيه كويس و بيبقي ردي او شكلي رخم.. بس انا بقول للكل كدة و معظم اللي حواليا عارف اني الصبح اول ما بصحي ببقي حيوان فاي حاجة بعملها مش ببقي قاصد.. انا لما بكون مبيت عند حد او مسافر او او لازم لما اصحي افضل في السرير شوية علشان ماقومش كدة علي طول اضرب اللي قدامي :) بحاول اغير بس من غير وعود


اخر موضوع هاتكلم فيه و هو التليفون... انا عامة مش بحب اتكلم في الموبايل او التليفون عامة و انا في البيت علشان كدة معظم الاوقات ببقي رميه بعيد عني و انا 90% بيبقي الموبايل سايلنت معظم الوقت فكتير اوي مابردش علي ناس و مش ببقي قاصد اني انفضلهم بس علشان مابحبش او بتضايق اتلكم في الموبايل في البيت مابتصلش بيهم بعديها في اغلب الاوقات



اكيد في حاجات كتير اكتر من كدة بكتير بس ده اللي في دماغي دلوقتي و اتمني ان الفكرة تكون وصلتلكم و اكيد هاتبقي في بوستات كتير زي كدة كل ما احس اني محتاج اصحح نفسي او اوضح حاجة فيا.

UA-37864249-1