Feb 24, 2012

تصاريح البناء و الضريبة العقارية

هو تصاريح البناء بتطلع علي اساس ايه؟ فلوس و بس؟ بقي عندنا مشكلة كبيرة اوي في القاهرة علي الاقل او علشان انا عايش فيها فده اللي انا شايفه لكن طبعا المشكلة في مصر كلها لانها مشكلة نظام و مشكلة روتين و فساد اداري و مهني. طيب الضريبة العقارية بندفعها ليه؟ الارض بيدفع تمنها و البناء بيدفع تمنه و توصيل المرافق العامة برده بيدفع تمنه يبقي ليه الواحد يدفع ضريبة عقارية؟ تبقي الاجابة واحدة و هي الفساد الاداري و المهني و "اغتصاب" المصريين.

تصاريح البناء
الموضوع مش موضوع اني ابقي مقاول و ادفع رشاوي و فلوس علشان اخد التصريح. طب هو الاول يعني ايه معني كلمة تصريح؟ يعني بتاخد اذن من "الحكومة" في الحالة دي انك تبني عمارة مثلا و يبقي بالتالي "الحكومة" دي هي المسئولة علشان تديك التصريح او الاذن.. طيب مسئولة ليه و عن ايه؟
ليه فده لانها بتتمثل في انها اشخاص مفوضين من قبل الشعب بحمايته و حماية مصالحه. طيب ليه برده ايه المشكلة ان الواحد يبني عمارة؟ ده موضوعنا الاساسي و هانتكلم فيه تفصليا.

- حماية ارواح الناس
الموضوع مش هزار و للاسف بقي عندنا استهتار فيه لدرجة كبيرة جدا جدا. الموضوع مش ان واحد مقاول (غالبا بيبقي من الصعيد) معاه قرشين بيشتري و يبني عمارة و هوب يبقي عمل مبالغ وهمية في فترة قصيرة جدا. كل ده تمام لكن المشكلة هي فين المهندسين؟ فين اللي يضمن ان العمارة دي معمولة بمقاييس تحافظ علي الناس اللي هاتسكن فيها. طيب انا لما اجي اشتري شقة في عمارة مثلا 10 ادوار اعرف منين العمارة دي التصريح بتاعها بكام دور؟ طيب ايه اللي يضمن ان "المونة" مش مغشوشة؟ ايه اللي يضمن ان الاساس "مصبوب" صح و علي عمق صح و لو الارض فيها مية او طينية يعني ماتهبطش بعد كام سنة؟ اسئلة زي دي كتير لازم ان قبل ما تتبني عمارة و قبل ما يطلع الترخيص بتاعها يكون كل ده متحدد في الترخيص و لازم يكون في شخص مسئول (مهندس) و مش بس كدة لازم يبقي في متابعات من الحكومة (الحي) علشان تشرف علي الموضوع ده كله علشان في الاخر بعض ما كل حاجة تتعمل تمام و تخلص زي ما تصريح البناء طالع يبقي في حاجة اسمها تصريح سكن بمعني ان العمارة خدت تصريح انها تتبني بقواعد معينة محددة في التصريح و بعد ما اتبنت و اتعاينت من الحي او الحكومة تاخد تصريح انها استوفت جميع الشروط و صالحة للسكن.

- المنظر العام
ليه مايبقاش لكل حي او لكل "منطقة" كود معين للالوان علي اقل تقدير؟ ليه اسيب المقاول يحدد لون العمارة بشكل شخصي و في اغلب الاوقات بيكون شكلها العام مقزز؟ ليه مايبقاش في كود لزغرفة معينة بثيم او موضوع معين لازم تبقي معمولة في العمارة بحيث الحي او "المنطقة" تبقي شكليا اجمل و ارقي و بالتالي بعد فترة نلاقي ان رقعة الرقي بتوسع.
طيب ليه مايبقاش برده لكل حي او منطقة كود للارتفاع؟ او لعدد الادوار؟ المفروض او علي الاقل اللي انا اعرفه ان الموضوع ده بيتحدد بوسع او عرض الشارع طيب ليه مايبقاش اولا الشوارع (طبعا الجديدة في الاماكن الجديدة) متحدد عرضها و العمارات (في الاماكن الجديدة او القديمة) يتحدد ارتفاعها و عدد ادوارها بعدد محدد ماينفعش ينقص او يزيد. لو المقاول معهوش فلوس علشان يكمل الارتفاع المحدد يبقي الحي يكمل الميزانية لاكتمال الادوار المحددة و تبقي ملكه يبعها بتمنها الاصلي و بكدة تبقي اتحلت.

- الازدحام و العربيات
كفاية محلات بقي كفاية بجد في المناطق السكنية المحلات تبقي لوحدها و العمارات لوحدها و لازم و شرط علي اي عمارة ان يبقي ليها جراج و ماتطلعش الرخصة غير بكدة لازم يبقي في جراج للعربيات و لازم يكون متحددله مساحة بحيث تناسب عدد الشقق و بناءا علي الاحصائيات عدد العربيات في الاسرة المصرية (يعني ممكن يكون الجراج دورين تحت الارض) و بكدة تبقي المشكلة اتحلت بتاعت الركن في الشارع و اكتر امان لاصحاب العربيات و اكثر رقي و تحضر.

- البيئة
الاحتباس الحراري و مشاكل الطاقة و الحزام الاخضر ممكن كل ده نساعد في حله بقوانين بسيطة جدا و اقل تكلفة من كل اللي فات ده.
ايه المشكلة لما ندرس شوية العمارات الذكية اللي ممكن توفر في استخدام الطاقة مثلا بالخلايا الشمسية او الرياح فوق كل عمارة؟ او الهندسة في البناء بحيث نوفر اكبر قدر من التهوية و الاضاءة الطبيعية علي قدر الامكان و بالتالي توفير طاقة خصوصا في الصيف للتبريد و الشتاء للتدفئة؟ استخدام مواد اكتر حفظا للحرارة و العزل؟ ما كل ده ممكن يتحط جوا شروط التصريح و هايساعد بشكل كبير اوي في كل المشاكل السابقة دي بل و هايوفر علي الدولة و علي الشعب مستقبلا.
السطح مثلا بدل ماهو معمول علشان نرمي عليه زبالة (مش زبالة زبالة بس الحاجات القديمة و اللي بتلم تراب و خلاص) ممكن لو مش هانستعمل الخلايا الشمسية علي الاقل نخليها خضرا و مزروعة ممكن حتي يبجي نجيلة بس (حشائش يعني) علي الاقل هايساعد في الاحتباس الاحراري, هايخلي المنظر احلي, و هايساعد كمان في الحر انه هايمنع الشمس و الحرار شوية. طبعا ممكن كمان يبقي السطح مكان ظريف يتعمل زي حديقة للعمارة بس بدل ما تكون قدامها يبقي فوق السطح. و كل ده ممكن يتعمل زي ما قلنا بتكاليف بسيطة و بمجرد شرط للتصريح.

نيجي بقي للجزء التاني و هو الضريبة العقارية و حل مشكلة العمارات اللي اتبنت خلاص. الضريبة ظي ما قلنا في الاول مالهاش اي لازمة ولا حق علشان تتاخد لان مفيش اي حاجة الدولة بتقدمها لساكني او اصحاب العمارات علشان تاخد ضريبة في مقابلها لكن ممكن الموضوع يبقي انه بدل ما الضريبة تبقي فلوس ان يبقي لازم العقار (العمارة يعني) يتعمل فيها حاجات من اللي قلنا عليها فوق. يعني ممكن لو بقي في كود للالوان في العمارات الجديدة في الحي يبقي الضريبة او مش هاتتسمي ضريبة بقي هاتبقي خطة مستقبلية للرقي بالحي و بالتالي بعد فترة هنلاقي الحي جديد و قديم ارقي من اي وقت.
نفس الكلام للحديقة السطحية (اللي فوق السطح يعني) و غيره و غيره.

شوية خواطر كدة للناس بقي
- اولا حرام عليكم انكم ترضوا تعيشوا في مكان لا يصلح للعيش و ترضوا و تتقبلوا الامر الواقع.. الموضوع حتي لو مكلف شوية بس بيستحق انك تبقي عايش في مكان كويس و كل ده انت ممكن تعمله مع جيرانك باقل التكاليف.. و الكلام ده حتي مش موجه لسكان العشوائيات اللي ليهم مشاكل تانية اكتر من كدة, لكن لناس في مستوي معيشي مستريح و كويس لكن بيرضوا انهم يعيشوا كدة و خلاص. مكان سكنك مش بس جوا شقتك لكن عمارتك و شارعك و حييك كله بيدل عليك و كل ده مكان سكنك و لازم انت و جيرانك تحاولوا انكم تجملوه بشتي الطرق البسيطة و المعقدة علي حسب تعاونكم.. لو مش عارفين تهتموا بعمارتكم, شارعكم, حييكم يبقي هاتهتم ببلدك ازاي و هاتعلم ولادك من بعدك يهتموا بيها ازاي؟ مش بس كدة واجب عليك تعرف قوانين الحي و اللي ليك و اللي علي الحكومة و تاخد موقف انت و جيرانك.
- مشكلة اطباق الدش بقي او الاطباق الفضائية دي اكتر حاجة بتضحكني لما كل شقة بتركب دش لوحدها و يبقي سطح عمارة كامل مغطي بالاطباق مع انه ممكن بمشاركة سكان العمارة يبقي في علي الاقل طبق واحد لكل قمر و بكدة نوفر تكاليف و نوفر شكل جمالي.


كل الكلام ده اه بياخد وقت و صعب انه يتحقق بسهولة علي مستوي كبير لكن اهي كلها حاجات بتيجي في دماغي و بكتبها و ممكن كتير غيري يكونوا بيفكروا في نفس الكلام ده و علي مستوي اكبر كمان و في النهاية احنا بنحاول.

خواطر عن التعليم

ليه عندنا مدارس ثانوي صناعي و تجاري و معندناش انواع تانية؟ ليه مفيش ثانوي فني (للفنون يعني مش اللي موجود دلوقتي) او ثانوي حقوقي الخ بجانب الثانوي العام؟ ليه الثانوي العام اعلي من الصناعي و التجاري مع انهم علي نفس القدر من الاهمية. ليه بيبقي الاختيار فيهم علي اساس المجموع و ليه مايبقاش اساسه الاقتناع و الاجادة؟ ليه مفيش مدرسة بتهتم بالكيمياء او العلوم عامة او الرياضة الخ الخ علشان اللي متفوق في حاجة يدرسها بجد و يجتهد فيها و بعدين يجي دور الكلية انها تثقل كل ده و تقدم فرصة للتطوير و الابحاث؟

التعليم اللي هو اول مراحل بناء مجتمع ناجح و قوي للاسف عندنا في مصر اهملناه علي مر العصور بالتدريج لحد ما وصل للصفر و تحت الصفر كمان.

التعليم مش مجرد امتحان عليه درجات و علي اساسها بيتحدد المستقبل.. تعالوا كدة نفكر في زمن من الازمنة و ليكن العصر الاسلامي لما انتشر فيه العلم بطريقة واسعة بل و اغلب اللي بندرسه دلوقتي مبني علي دراسات و اكتشافات تمت في العصر ده. كان في امتحانات بتحدد علي اساسها الشخص يدرس ايه او يعمل ايه؟ هل كان لازم اللي يدرس حاجة معينة يبقي هي دي و خلاص؟ هل اصلا كان التعليم بالعافية او رتبة اجتماعية؟ طبعا التعليم او العلم عامة بيرفع شأن صاحبه بس ابدا مش لازم يكون ده الغرض منه.

كان ممكن في العصر ده ان طالب يسيب اهله و بيته و بلده بحالها و يروح لبلد تانية علشان يتعلم شئ ما. كان بيسافر بالاشهر و يعيش بالسنين علشان يتعلم حاجة هو عايز يتعلمها. مكنش لازم يبقي مهندس او دكتور او لازم يطلع سباك علشان بتجيب فلوس. كان في الاغلب العلماء او اللي بيجتهدوا في علم ما و بينجحوا فيه بيبقوا قريبين للحاكم علشان هو يستفيد منهم و كان بينفق عليهم اموال طائلة و ده ان دل فبيدل علي ان العلم و الحكمة اهم من اي حاجة تانية.. اهم من الفلوس و المنصب. فالعلم هو والوسيلة و الغرض نفسه.

نرجع لمرجوعنا بقي, عمر ما بلد هاتبقي اقوي بجيشها في مواجهة الدول و البلاد التانية.. الجيش اصلا ملوش لازمة من غير علم فالجيش مش مجرد اعداد بل بيتكون من مجموعة علوم لو اهتمت بيها البلد بيصبح الجيش او العدد مهما كان فعال بنسبة كبيرة و لو بصينا لبلد زي امريكا مثلا هنلاقي ان الجيش بيهتم باي تكنولوجيا جديدة او علم جديدو ممكن يدفع فيه فلوس علشان يطوره لاستخدمات عسكرية او مهما كانت المهم ان لازم يبقي في اهتمام بالعلم و التعليم لاقصي درجة علشان رخاء اي مجتمع.

في مصر, لو اخدنا علي سبيل المثال التعليم الثانوي العام هنلاقي ان الغرض منه اننا نطلع جيل (او اجيال بقي لان مفيش حتي تطوير في المناهج) كله زي بعضه. يعني لو في مشكلة ظهرت في وقت ما عمر ما الجيل اللي في وقت المشكلة او حتي اجيال بعديه هاتعرف تحلها.. ليه؟ لانهم ببساطة كلهم زي بعض عبارة عن شوال بيتملي معلومات قديمة و عفي عليها الزمن و اغلبها بتبقي نتايج من غير حتي شرح الوصول ليها بيبقي ازاي علشان في الاخر تدخل امتحان واحد و يا تصيب يا تخيب.. حياتك كلها معتمدة علي الامتحان ده يعني لو ربنا كرمك مثلا في يوم الامتحان ان سنانك وجعتك او اي حاجة حصلت يبقي راحت عليك و من غير حتي ما حاجة تحصل كفاية انك تبقي عارف و بتفكر في كل حاجة ورا الامتحان ده من مستقبلك و هايحصل ايه لو فشلت او الامتحان جه صعب او من برة المنهج او او او.

حد يقدر يقولي اخر مرة تم تطوير التعليم او المنظومة التعليمية في مصر امتي؟ طيب مينا فينا ماعداش علي مرحلة تعليمية و اتقاله "انسي اللي اتعلمته في المرحلة اللي قبليها"؟ امال احنا بنتعلم علي مراحل ليه؟ و لما هو فعلا كدة ليه محدش بيفكر يصلح الموضوع؟

هانتكلم طبعا في موضوع الميزانية و الامكانيات و خلافه لكن للاسف الموضوع ده مش مشكلة ابدا. مش هاتكلم حتي ان الميزانية في مصر مسروقة و كل الكلام ده لكن هاتكلم بشكل ابسط شوية.

الموضوع مش سهل بس حاولوا تتخيلوا شوية.. كلنا عارفين معارض العلوم علي سبيل المثال بتحصل في كل الدول المتقدمة.. المعارض دي بيبقي ليها رعاة من شركات بتدور علي افكار او علي موظفين و بالتالي بتشجع الدولة او المنطقة التعليمية انها تعمل المعرض مما بيؤدي الي تحفيز الطلاب علشان يعملوا حاجة كويسة و في النهاية بيعود بالنفع علي كله.. الطلاب علي الاقل بيتعلموا ازاي يفكروا و كل مرحلة بيبقي الموضوع مختلف لحد ما هايوصلوا لمرحلة هايعرفوا فعلا يقدموا حاجة جديدة و مميزة. الشركات الخاصة هاتستفيد لانها هتلاقي افكار جديدة او مهندسين جدد او فرص باي طريقة علشان يكسبوا فلوس اللي في الاخر هايعود بالنفع علي الطالب كمستقبل, الدولة كرخاء اقتصادي و تقدم.

طيب ليه مانعملش الموضوع ده علي مستوي ابعد و اكبر شوية؟ انا مش هاقدر اأقدم حلول لاني مهما كان مش عامل بحث و مش عارف كل حاجة.. لكن انا بس بقول وجهة نظري في الموضوع.

انا شايف ان مفيش حل غير تغيير المنظومة التعليمية بحيث انه يحصل تطوير يخلي المدارس الثانوي اللي موجودة دلوقتي بنظام التعليم فيها = التعليم الجامعي بنفس المنظومة من غير منهج معين محدد من غير ما يبقي كل المدارس و كل الطلبة بيدرسوا نفس الشئ من غير ما يبقي امتحان واحد هو اللي متوقف عليه حياة البني ادم. من غير ما نجيب واحد مايعرفش حاجة عن الطالب اللي بيصححله الامتحان.. مايعرفش هو كويس فعلا ولا غاشش ولا كويس و حصلتله ظروف في الامتحان. اشجع ان يبقي في علاقة بين الطالب و المدرس او الدكتور علشان يبقي فيه ابداع مش مجرد بسمع اللي بيقوله الدكتور علشان احفظه او حتي افهمه زي ما هو كدة علشان الامتحان. و مش شرط في الامتحان تكون الاجابة صح مية في المية المهم طريقة التفكير للوصول للحل و لازم يبقي في اكتر من طريقة علشان تحسن المستوي مش مجرد امتحان معين او مجموعة امتحانات بيتحدد بيهم كل حاجة. لازم ندي فرصة للاجيال اللي بعدينا انهم يفكروا بطريقة مختلفة و نشجعهم علي ده. لازم نهتم بالتعليم لان ببساطة بثورة او من غير طالما مفيش تعليم يبقي مفيش مستقبل.

لازم نبقي حاطين في دماغنا ان الموضوع مش هايتحل بكام قرار وزاري او مش هانصحي سنة من السنين نلاقي الموضوع بقي سهل و اتحل. بس علي الاقل لو كل واحد فينا فكر في الموضوع ممكن قدام يبقي في أمل.. ممكن واحد يهتم و في المستقبل يوصل لمنصب يخليه يعرف يساهم في حل جزء من المشكلة او علي الاقل هانشجع اولادنا احنا انهم مايبقوش مجرد ثيران مربوطة بساقية او ان في طريق واحد لازم كله يمشي عليه.

البقاء لله

عمري لما حد بيموت بزعل عليه انه مات.. مهما كان كويس او وحش فهو خلاص عند اللي خلقه الرحمن الرحيم الغفور التواب. الزعل بيكون للفراق.. لفكرة انه خلاص مابقاش معاك.. وقت ماتعوز تشوفه ماتلاقهوش.. اخر مرة شوفته فيها بتفضل في صورة في دماغك و بتفضل تقول لنفسك يا ريتني ساعتها كنت سلمت عليه اكتر.. يا ريتني كنت قعدت معاه اطول لكن مفيش في ايدينا دلوقتي غير الدعاء.

صعب ان أب يروح يدفن ابنه.. صعب ان أم مرة واحدة متلاقيش ابنها في حضنها.. صعب ان اخ يبقي فجأة لوحده من غير اخوه.. صعب ان صاحب مايلاقيش صحبه. لكن في الاخر.. البقاء لله.

Feb 19, 2012

الراوتر

امبارح اتكلمت عن كلمة مرور النتورك او الشبكة او الوايرليس و اتكلمنا باختصار عن الفرق بين انواع التشفير بس في حاجة مهمة جدا لازم نخلي بالنا منها.

علشان تغير الباسورد او كلمة المرور او اي حاجة متعلقة بالشبكة فلازم تدخل علي الراوتر باليوزر و الباسورد اللي المفروض انت بتغيرهم اول ما بيجيلك الراوتر من الوضع الافتراضي للي انت عايزه. المشكلة هنا ان كتير من الناس بتسبها علي الوضع الافتراضي ده و يبقي اي حد علي الشبكة سواء تعرفه او ماتعرفهوش بمجرد ما انه يعرف نوع الراوتر يقدر يدخل عليه باليوزر و الباس الافتراضي و يعمل اللي هو عايزه.

الاكتر من كدة ان معظم الرواتر بيبقي عليها وضعين افتراضين. وضع المستخدم العادي اللي انت بتغيره ده و وضع الادمن. الادمن بيبقي اليوزر ادمن و الباس ادمن و معظم الرواتر اللي انا شوفتها لحد دلوقتي فيها الموضوع ده و بسهولة جدا ببقي جوة الراوتر و ممكن من جوة تغير حاجات كتير سواء عايز تخرب او عايز تلعب.

جرب دلوقتي و انت قاعد ادخل علي الراوتر بتاعك اللي غالبا بيبقي (192.168.1.1) او (192.168.1.254)  وده كله طبعا لو انت مش مغيره ده الوضع الطبيعي يعني. و بعد ما او قبل ما يدخلك يعني هايطلب منك اليوزر و الباس فجرب التالي :
User : admin
Password : admin

و شوف هايدخلك ولا لا. طبعا تقدر تعرف اذا كان في يوزر تاني ولا لا و كل حاجة عن الموضوع ده من الراوتر في الجزء الخاص بكدة علشان تبقي فاهم كل حاجة بتحصل و مش اي حد يقدر عن قصد او من غير قصد يبوظ حاجة كدة ولا كدة.

Feb 18, 2012

من أجلك أنت

قلت اني علي قد ما اقدر مش هاتكلم عن السياسة.. و بصراحة مش قادر ماتكلمش.

كتير مننا شباب و صغيريين محضرش بداية الحزب الوطني للاسف لكن مش مشكلة فالتاريخ بيعيد نفسه. الحزب الوطني الجديد (حزب الحرية و العدالة او حزب الاخوان او ابو دقون) في التكوين علشان يبقي خليفة الحزب الوطني القديم.

نفس السياسة و نفس الاسلوب. اي حد يعارضهم يبقي مش مصري و عميل و خاين و اهبل. اي موضوع بيتكلمه فيه سواء في المجلس او اعلام بيبقي كلام مايع فيشتموا في فلان قدام الناس لكن من ورا الستارة حبايب (زي الحزب الوطني و الجماعة المحظورة سابقا كدة) علشان النظام يمشي و علشان يبقي في معارضة و يبقي في مسرحية مكتملة الاركان.

من كام يوم كدة طلعلنا حملة "ضباط ملتحين" و بغض النظر عن اي حاجة, فاهلا بكم في سياسة بوس الايادي و اتلون بلون اللي حاكمك... زيهم زي التليفيزيون المصري بيطبل للي حاكم. و بعديها بفترة ظهرلنا في الاخبار "دفعة الشرطة الاخوانية" و بعديها هايبقي القضاة و المطافي بقي و كل حاجة و اي حاجة و في النهاية هايتحول "الحرية و العدالة" الي "الوطني" يعني هايبقي "من أجلك أنت".

الاخوان و السلفيين (كاحزاب و مجموعات) اوسخ ناس في مصر. الدين مش بالشكل. و الدين او التدين مش هدف علشان يلعبوا بيه.

كل واحد في النهاية حر في اختياره لكن يا ريت يبقي في شوية تفكير و عقل. لو هانمشي ورا اي حد لاي سبب من الاسباب حتي لو كان الدين, يبقي كنا فضلنا نعبد الاصنام احسن علشان كان كبار القوم بيعبدوها و كان اجدادنا بيعبدوها و نفضل كدة من غير دماغ ومن غير تفكير. مش علشان ربي دقنه و اتكلم فصحي و قال الله و قال الرسول يبقي راجل تمام و صح و مش كل واحد ربي دقنه يبقي علي طول جاهل و رجعي و اخواني و سلفي. الشكل و الكلام مالوش لازمة من غير افعال و حقايق. و كل دول مالهمش لازمة من غير عقل و تفكير.

وايرليسك في خطر

مفيش حد تقريبا دلوقتي معندوش انترنت مع شركة من شركات الانترنت اللي ضاحكين علينا في كل حاجة دول بس ما علينا مش موضوعنا ده. المهم ان علشان السهولة و الراحة بقي كله وايرليس او لاسلكي يعني و اظن كل واحد عنده في بيته راوتر و عايش لكن للاسف الرواتر او الشبكات اللاسلكية عامة خطر جدا مش لان ممكن حد تاني يستخدمها او يدخل عليها لكن اي حد يقدر يوصل ليها و فاهم هو بيعمل ايه ممكن يعرف كل اللي بتعمله انت و اكتر و يبقي مفيش خصوصية و الاكتر انه ممكن يعمل اي حاجة في الكومبيوتر نفسه ده غير طبعا انت ماتعرفش هو بيستخدم الانترنت في ايه و خصوصا ان اختراع سياسة الاستخدام العادل ده ممكن يوديك في داهية لو هو بينزل حاجة او بيستخدمه اكتر منك.

طبعا كلكم بتقولوا ماهو في باسورد ( واتمني ان محدش يكون سايبها من غير كلمة سر علي البحري كدة) بس مش مجرد ان في كلمة سر يبقي كله تمام و ده اللي هانتكلم فيه بس احب اوضح حاجة الاول. الوايرليس عمره ماكان امان و اظن انه صعب يبقي بعد كدة و هايبقي علي طول في طرق علشان اي حد بسهولة ينط في الشبكة بس كل اللي احنا بنعمله اننا بنصعب الحاجة علشان مش اي حد مش فاهم مثلا و بمجرد برنامج هو مش فاهم شغال ازاي اصلا يقدر يجيب كلمة السر و الغالب انه لو فاهم و علي مستوي انه يقدر يجيبها مهما كان فالاغلب انه مش هايبقي بيخرب او مش هايعمل حاجة تضر لانه هو بالنسبة ليه الموضوع اكبر من كدة و طبعا لكل قاعدة شواذ.

الرواتر مهما كان نوعه بيوفرلك خاصية كلمة المرور باكتر من طريقة و لازم تبقي فاهم ازاي تخلي الموضوع فعلا محمي.

من غير كلمة مرور خالص :

     طبعا انت كدة عايش علي البحري و اي حد و كل حد اصلا معاك في و انت كدة بتقدم خدمة حلوة للمجتمع بس اشرب بقي :) .

كلمة مرور WEP :

      ده بتلاقيه في الراوتر و انت بتظبط الشبكة تحت نوع التشفير او Encryption و ده زيه زي انك ماتبقاش عامل كلمة مرور اصلا و اي حد بيفهم او حتي مابيفهمش ممكن في خلال 30 دقيقة بالكتير يكون معاه كلمة المرور مهما كانت فطبعا ده اسوأ انواع التشفير و للاسف اغلب الرواتر اللي بتيجي من شركات الانترنت هنا بيبقي ده اللي شغال جاهز فيها و الاغلب مابيغيروش فطبعا بيبقي سهل علي اي حد ينط معاهم في الشبكة و لحد دلوقتي معرفش ليه شركات الانترنت مابتوفرش معلومات عن اهمية الموضوع ده.

كلمة مرور WPA و WPA2 :

      دي تعتبر احسن حاجة لكن برده لازم شروط. علشان اي حد يقدر يجيب كلمة السر دي فلازم انه هاياخد وقت علي حسب الطريقة اللي بيستخدمها و في الاغلب بتبقي سهلة عليه لو كلمة السر كلمة معروفة او كلمة ليها معني او مكونة من حروف صغيرة او كبيرة. فبسهولة انت ممكن تختار ده و تعمل كلمة سر تكون طويلة و يكون فيها ارقام و حروف صغيرة و كبيرة و بكدة هايبقي صعب جدا ان حد يجيب كلمة السر.
امثلة
67E73060b40hE30ZqaP5

تكنولوجية الـWPS :

     دي تكنولوجيا جديدة و مدمجة في كل روتر جديد و هي باختصار عبارة عن طريقة علشان لما تبقي عامل كلمة مرور رخمة زي اللي في المثال و عايز حد يدخل علي الشبكة من غير ما تقعد تكتب كل ده فبتدوس علي زرار الـWPS في الراوتر و في كارت الوايرليس (زرار بجد او عن طريق سوفت وير) و بالتالي الجهازين يتوصلوا ببعض بكل سهولة من غير ماتقعد تكتب حاجة و الموضوع ده بقي في اغلب الاجهزة الحديثة اللي بتدعم الوايرليس سواء الراوتر او الكومبيوتر او حتي البرنتر.

 
و طبعا مع كل خاصية بتوفر السهولة و الراحة بتبقي برده سهولة و راحة لاي حد عايز يستفيد منها علشان يدخل علي الشبكة و للاسف الطريقة دي حتي لو كلمة المرور "مجعلصة" و بطريقة تشفير WPA  و حد بطريقة معينة يقدر يدخل علي الشبكة في خلال يومين و ممكن اأقل كمان و الطريقة باختصار ان معظم الراواتر الجديدة اللي فيها الخاصية دي بتسمح لاي جهاز انه يجرب الاكواد لحد ما يجيب الكود الحقيقي من غير ما يمنعه و لو ان في بعضها لما بتجرب مثلا 5 مرات ورا بعض بيمنعك لفترة معينة او بيمنعك نهائيا و ده اللي المفروض يحصل انه يمنعك نهائيا لكن للاسف مش في كل الرواتر.

الحل انك تقفل او تلغي الخاصية دي علشان تبقي في السليم و كل راوتر طبعا ليه طريقة علشان تغير الاعدادات ولازم تبقي عارفها و تبقي فاهم بتعمل ايه و تغير الاعدادات صح و دي ممكن تقرأ المانيوال او الدوكيومينتيشن بتاع الراوتر سواء لو معاك او من علي الانترنت او ممكن تسال حد بيفهم و تكون بتثق فيه او حتي اسالني انا و انا هاحاول اساعدك باللي اعرفه ان شاء الله.


نصايح صغيرة :

      - غير دايما اسم الوايرليس متخلهوش يبقي بيدل علي نوع الراوتر او حتي شركة الانترنت.
      - حاول كلمة السر متبقاش نمرة موبايلك لان ممكن اي حد عارفك او ساكن حواليك عارفها و يعرف الشبكة بتاعتك.
      - ماتفتكرش انك عامل اسم الشبكة مش ظاهر او hidden يعني انك كدة في التمام.

و في النهاية في كذا حاجة تانية لازم نعملها علشان برده يبقي كله تمام بس دي ليها موضوع تاني قريب ان شاء الله و اتمني ان الموضوع ده يفيد اكبر عدد لان مفيش كتير فاهمين الموضوع ده و مش هاتتخيلوا الموضوع سهل اد ايه ان اي حد يعرف اي حاجة انت بتعملها علي الانترنت.

Feb 17, 2012

السعادة الابدية

الدنيا علمتني ان دايما بعد كل لحظة حلوة او سعيدة لازم تبقي في فترة حزن و نكد بعديها. معرفش هو ده حال الدنيا ولا الدنيا معنداني انا زيادة حبتين؟
اي يوم ببقي بضحك فيه و فرحان دايما بفتكر ان بكرة جي و ان بكرة هابقي اكيد مش فرحان فيه. طب يمكن الحزن ده بحس بيه علشان حاطط في دماغي ان لازم بعد الفرح يجي حزن؟ ولا هو فعلا لازم كدة؟

الحاجة الوحيدة اللي متأكد منها ان لو كان كدة او كدة فانا مش هابطل افرح.. و مش هابطل احزن لأن هي الدنيا كدة فعلا عاملة زي المرجيحة و في اغلب الاوقات المرجيحة لما بتبقي تحت بتبقي بتحُك و بتخبط في الارض قبل ما تطلع فوق و بعد ما تطلع و تحسسنا اننا هانطير لفوق في لحظة بتاخدنا و تقع بينا تحت علشان تخبط في الارض و لازم علي قد ما هاتطلع لفوق علي قد ما هايبقي السقوط و الخبط في الارض اعنف و اقوي.

اللي لازم احاول اني اوصله اني استمتع بتخبيطها و حكها في الارض زي ما بستمتع و هي طالعة بيا لفوق و ساعتها من وجهة نظري هابقي وصلت لمرحلة السعادة الابدية.

Feb 14, 2012

الحب الحب

بكل الحب هانتكلم عن الحب. و بكل الحب هاناقش كل قضايا الحب. ﻻ ﻻ مش ده خالص اللي قصدي عليه ولا اللي في بالي و  ماينفعش ابدا اتكلم انا علي اي حاجة في الحب باي شكل من الاشكال لكن شوية حاجات كدة فكرت فيها بالصدفة و انا قاعد في لحظة روقان كدة و بقرأ ميكي و حبيت اكتب عنها بما اني بقالي كتير ماكتبتش حاجة هنا و كان صدفة مش اكتر ان كل ده يحصل النهاردة - الرابع عشر من فبراير.

في ميكي اللي اظن ان الاغلبية بيقروها او علي الاقل قروها مرة قبل كدة و كلنا عارفين ميكي و ميني و بطوط و زيزي اللي هما مش متجوزين ولا عايشين مع بعض ولا حتي بتبقي في صفحات او قصص للكبار فقط في المجلة. لكن بيحبوا بعض و تقريبا في ما بينهم كل حاجة يتضمنها الحب الحقيقي و مع ان صعب ان حد يشوف المجلة بالمنظر ده لكن انا متأكد ان من صغرنا و من طبيعة الحياة ان يبقي جوانا الحب ده من غير كل المشاكل اللي اخترعناها و بنعيشها و من غير كل الافكار و الانحرافات اللي بنفكر فيها علشان فاكرين ان ده بس اللي عايخلينا فرحانين او ان ده الهدف من الحياة.

اتمني ان النهاردة يبقي كل اتنين بيحبوا بعض.. كل واحد بيحب اي حد... اي نوع من الحب طالما حب صادق, ان الحب يجمعهم علي طول حتي لو كانوا مش علي طول قريبين من بعض.

و اهم حاجة اننا مانبطلش نحب بلدنا و ماننساش نحب ولا نبطل حب لكل الشباب اللي ضحوا بحياتهم علشان بلدنا و علشان كل واحد فينا..
UA-37864249-1