May 25, 2012

انتخابات الثورة

انا مش دارس سياسة ولا بعتبر نفسي بفهم فيها و كل اللي هاقوله هنا هو نتاج تفكير و (فذلكة) خاصة بيا.

اولا عدي اكتر من سنة و الدستور مااتكتبش و لا اتعدل بعد الاستفتاء اياه و بالتالي اختيار الرئيس من غير دستور يعني اي كلام في اي كلام خصوصا انه جي بشرعية و بالانتخاب مش رئيس و لا مجلس رئاسة مؤقت و طبعا في مليون خطر و غلط في كدة و مش هاتكلم فيهم.

نيجي بقي للانتخابات ذات نفسها. انا هاكتب كذا نقطة تحت يمكن يبقوا فيهم ديكتاتورية و ممكن يزعلوا ناس كتير و ممكن يكون صعب يتعملوا لكن هي مجرد افكار.

- قصر التصويت علي حملة الشهادات و المؤهلات العليا فقط و طلبة الجامعة.
     الاميين و اللي ماتعلموش و اللي بيخروجوا من المدارس علشان يوفروا لقمة العيش مالهمش ذنب في كدة بل دي مشكلة المجتمع ككل.. لكن ماينفعش نخلي واحد مابيعرفش يقرأ و يمكن ماتعلمش كويس يبقي متحكم في صوته الانتخابي اللي ممكن و اسهل التأثير عليه سواء بالماديات او الكلام من غير ما هو يفهم و لا يعرف ايه الصح ولا الغلط. (اذا كان المتعلمين بيقعوا في الاخطاء دي ما بالك بقي)

- التصويت من 18 لـ 40 سنة فقط و تزداد تدريجيا مع كل انتخابات رئاسة بمعدل 5 سنين.
     يعني في اول انتخابات اللي احنا كنا فيها دي يبقي العمر للمنتخب من 18 لـ 40 سنة و الانتخابات اللي بعدها تبقي من 18 لـ45 و هكذا لان اللي اكبر من 40 دلوقتي عاشوا حياتهم موافقين علي النظام (مش كلهم طبعا و باختلاف الطباقات) و صعب انك تغير تفكير واحد كبير كدة و تفرمتله دماغه بنظام جديد و ايه الصح و ايه الغلط. ده اكتر من كدة ان في وقتنا الحاضر اللي اكبر من 40 او مش من الشباب يعني حتي و لو كان بيحب البلد و عايز الخير ليها بيدور علي الاستقرار و الهدوء علشان ولاده و علشان البيت اللي هو فاتحه و علشان شغله اللي هو فيه و خايف يضيع منه الخ.. الخ.. بالاضافة ان الشباب هايبقوا اصعب في انهم يضحك عليهم بشوية كلام ولا بالتموين.

- استخدام التكنولوجيا في التصويت
     انتم متخيلين احنا بنعمل ايه؟ احنا شغالين ورقة و قلم و عد و ناس كتير و النتيجة تتأخر و غيره و غيره... باستخدام و التفكير في حاجات كتير اوي ممكن تخلينا نعمل الحاجات دي بشكل اسرع و احسن و اوفر سواء باستخدام الداتا بيز في انك تعرف مين اللي انتخب و مين اللي لسة (بدل حبر اللي بنستورده من برة و مابيشتغلش اصلا) و مين اللي اصلا مالوش حق انه ينتخب و في ساعتها نقدر نعرف نسبة المشاركين في الانتخابات لحظة بلحظة... يمكن النقطة دي محتاجة شوية وقت و صعب تنفيذها علي نظاق واسع و في مصر دلوقتي بس عدم التفكير فيها و استخدام ابسط الامكانيات فيها من دلوقتي يبقي عمرنا ما هانوصلها قدام.

- حظر ترشيح كل من كان علي علاقة بالنظام السابق بشكل رسمي لمدة 8 سنين او فترتين رئاسيتين.
     قالك قانون العزل و شفيق و موسي نازلين و بيعايروا بعض كمان بانهم فلول.. و ناس بتقولك اصل مش كل واحد كان مع النظام القديم يبقي فلول.. خلاص احنا مش هانمنعه خالص لكن هانمنعه لفترتين علشان علي الاقل يبقي اتعود علي التغيير و يعرف يشتغل كويس لانه اكيد مش هايعرف يشتغل في النظام الجديد.


في كلام كتير ممكن يتقال في الموضوع ده و فيه ناس بتفكر في حاجات اكتر من كدة... بس للاسف اللي مسئول عن الانتخابات مايعرفش اصلا يعني ايه انتخابات او ديموقراطية او احترام الرأي.

May 18, 2012

خواطر

الامي اول ما يلاقي واحد بيعرف يقرأ و يكتب ممكن يمشي وراه في اي حاجة. الجاهل او الغير المتعلم هاياخد كلام اي حد متعلم عنه علي انه مسلم بيه. طبيعة في النفس المصرية انك بتدور علي اللي انت نفسك تكونه في غيرك و لو لاقيته بيبقي غيرك ده مثلك الاعلي و هاتمشي وراه و انت مغمض.

نفس الموضوع ينطبق علي الدين... كلنا نفسنا نبقي متدينين صح و عارفين اننا بنعصي ربنا كتير علشان كدة او ما يجي واحد بدقن او يتكلم كلمتين فصحي في الدين بنمشي وراه و نقول عليه احسن واحد في العالم مع انه ممكن مايبقاش كدة بل بالعكس.

لو شايف الدين هو الحل مهما كانت ديانتك.. يبقي تدين انت الاول و ماتعصيش ربنا و بعدين دور علي الصح و الغلط في الناس بعدين... و افتكر دايما ان الدين (الاسلامي علي الاقل علشان عارفه اكتر) هو معاملة بين الناس اكتر من مجرد جلابية او دقن او اتهام الناس بالضلال علي الفاضي و علي المليان..

May 5, 2012

الغباء الثوري

مابعتبرش نفسي من الثوار او شباب الثورة او شباب التغيير لاني ببساطة معملتش اي حاجة تخليني اكتسب المسمي ده. و يمكن اكتر كمان اني اكون مابفهمش اي حاجة في اللي بيحصل ده و يمكن عمري ما هاعرف اصلا.

موقفي من الثوار ثابت تقريبا من ايام التنحي و لو اني كنت ضدهم قبله. الثوار بقوا بالنسبة ليا دلوقتي عاملين زي الفلسطينين اللي بيروحوا يفجروا نفسهم وسط كمين و يصيبوا اتنين اسرائيلين.. فهم (المثال الفلسطيني و الثوار) علي حق و اصحاب ارض و قضية و لهم كل الحقوق و بيقدموا اغلي ما يمتلكوا في سبيل القضية و هي حياتهم لكن في النهاية هما بالنسبة لي "اغبياء". الكلام طبعا مش علي الكل ولا المقصود بيه التجريح ولا التشويه و ماينفعش واحد في مكاني في بيته يقول اي كلمة علي اي حد من الثوار.. لكن انا مجرد بشرح وجهة نظري للمواقف العامة اللي بتحصل.

احنا دلوقتي مش محتاجين اننا ننزل نموت و نعمل مظاهرات و نقول سلمية سلمية واحنا بنتقتل بكل برود.. الفترة دي عايزة حشد لكل الاطياف و عايزة تعليم و توعية و عايز تفكير قبل الفعل لان الاندفاع ولو علي حق مش حاجة كويسة.. لازم تفكير و دراسة و توعية الشعب لاننا واقفين قدام عدو اكبر و اخطر من المجلس العسكري او المتأسلمين او اصحاب المصالح الا و هو الجهل و هو اكتر حاجة ضرنا بيه النظام السابق و اي حد عايز يوصل بالدوس علي الشعب. 


انا اسف لو كلامي ممكن يزعل حد او يفهمه غلط. و اسف لو انا اصلا فاهم غلط.
UA-37864249-1