Jun 29, 2013

لو اكتشفوا علاج للسرطان غالبا مش هايعلنوا عنه للناس..محتاجين الناس تموت علشان الساقية تفضل شغالة..تفضل دايرة. لازم تبقي في امراض علشان الدكاترة تشتغل و المعامل تعمل تحاليل و شركات الادوية تعمل ادوية و الصيداليات تبيع و يبقي في ناس بتنقل الادوية من مكان لمكان و ناس بتشتري و دوا يدخلوه في قايمة المخدرات فسعره يغلي في السوق و يبقي الاقبال عليه اكتر.

لو الناس مامتتش من السرطان, الايدز, السموم, او انفلونزا الخنازير او الطيور..لو مافيش سارس و مشتقاته...العدد هايزيد زيادة عن اللزوم. في رسالة اكتشفتها الحكومات غالبا بالممارسة و هي ان عدد السكان بتاع كل بلد لازم يتراوح مابين نسبة معينة لو زادت او قلت الحكومة بتضعف و مكانها بيبقي في خطر...الحكومات و الشركات الكبيرة عارفين كدة كويس..بيشتغلوا مع بعض علشان يسيطروا علي الموضوع ده.. يسيطروا علي البشر.

لو شركة زي ويسترن ديجيتال اخترعت او اكتشفت طريقة علشان نقدر بيها نخزن مثلا 100 تيرابايت بنفس التكلفة اللي ممكن نخزن بيها 1 تيرابايت او اقل او علي مساحة فعلية اصغر...هايطلعوها للناس؟ ما لو الناس اشترتها الشركة مش هاتشتغل زي الاول و مش هاتكسب فلوس و الناس مش هاتبقي محتاجلها.

القس اللي بيبقي في الكنيسة لو بطل يبيع للناس الدين يبقي مش هايبقي ليه لازمة..لو الدين اللي هو بينشره او بيتكلم عنه مش مديله مقام او لازمة مكنش هايشتغل الشغلانة دي.. شيخ الجامع لو محدش بيقعد يسمعله خطبة الجمعة هايلم حاجته و يمشي...لو ماتحكمش في الناس باسم الدين مش هايحس بنفسه ولا بوضعه...بيقولك تلبس ايه و تتكلم ازاي و تاكل و تشرب ايه و بيقولك مين وحش و مين حلو..بيطبل للي عايزه و يسن السكاكين لناس تانية...اللي بيشتغل الشغلانة دي..الشيخ او القس او مهما كانت التسمية بيبقي عارف انه لو فضح اللي زيه هو كمان هايتفضح علشان كدة كلهم بيطبلوا لبعض...مش لازم يبقوا متفقين و مش لازم يبقوا بيبيعوا نفس الدين او العقيدة بس لو حجر دومينو واحد وقع هايوقع كله وراه..او قدامه.

لو في طريقة مثلا الواحد يتعلم بيها علي طريقة فيلم ماتركس..في ثواني او دقايق او حتي ايام...المدارس هاتقفل زيها زي الجامعات و المعاهد و غيرهم...كل الناس دي مش هايبقي ليها لازمة..الدكتور مش هايبقي مهم ولا المهندس ولا غيرهم هايبقي كله في نفس المستوي اللي عايز يتعلم حاجة هايتعلمها و يعملها بنفسه لنفسه...مفيش اعتماد علي حد و اللي هايبقي احسن هو اللي هايطور نفسه و يلاقي حاجة جديدة يدور عليها..حاجة جديدة بعد اللي الناس كلها وصلتله علشان هو سهل يعرف الناس وصلت لايه بسهولة و يكمل بعدها بجهده هو...مش يتعب في معرفة الناس قبله عمله ايه و وصله لفين لحد مش يكره اللي هو بيعمله اصلا.


لو مفيش بلاد و يمين و شمال و العالم كله بقي ارض واحدة من غير حدود...المجتمعات هي اللي تحدد ثقافتها و ايه اللي تتقبله و ايه اللي ترفضه..مش هايبقي في ارض الاحلام و دول بتعاني... كله هايبقي متساوي و هايبقي بيتعامل مع بعضه ان كل ارض فيها حاجة غير التانية ممكن يبدلوها مع بعض...مش هايبقي في حروب ولا مشاكل و ده ماينفعش بالنسبة للشركات و الحكومات..الناس هاتكتر زيادة و مصانع السلاح هاتقف و كل اللي تحتيهم. لازم يخوفوك من غيرك علشان بخوفك تشتري حاجات انت مش محتاجها او محتاجها بس يعلوا سعرها..لازم يفهموك ان اي حد مختلف عنك وحش..علشان مايبقاش في صلة بينك و بينه و طول مانت مركز انه عدو ليك مش هاتشوف حاجة غيره قدامك.

لو هايعملوا موبايل...لازم يبقي بيبوظ علشان شوية و تشتري غيره لانه لو عاش معاك كتير مش هايستفيدوا منك. لما يعملوا ميزة في الموبايل لازم يكونوا عارفين او عملوا الميزة اللي احسن منها علشان لو مفيش احسن منها يبقي مش هاتشتري اللي هايعملوه تاني و الشركة هاتقف و مش هاتدفع ضرايب ولا فلوس للحكومات و تفضل نفس الدايرة.

اكتر حاجة ممكن يسيطروا بيها عليك هي الخوف و الكره..اسهل شعورين ممكن تغذيهم بحاجات بسيطة مش محتاجة مجهود لان الانسان اصلا زي باقي الحيوانات كلها لازم يخاف علشان يعيش بس عنده الكراهية اللي مش موجودة في باقي الحيوانات او المخلوقات. لازم يخوفوك انك كدة كدة هاتموت و في حاجة بعد الموت علشان تبتدي تدور في المنتجات اللي موجودة اللي هاتنفعك بعد موتك..تشتري دين من بتوع الدين زي ما يبيعولك...هاتجري في الساقية علشان تجرب حاجات قبل ما تموت.


لو مكان ما..بلد, مدينة, قرية, او مجتمع محصلتش فيه سرقة كل شوية محدش هايشتري اقفال يقفلوا بيها الحاجة. لازم كل فترة يطلع خبر سرقة. لو مش عايزين الناس يروحوا منطقة معينة يبقي كل انواع الجرايم هاتنتشر فيها..سرقة, قتل, بلطجة, امراض. لو عايزين يتحكموا في الستات يبقي هايغذوا ثقافة المعاكسات و الاغتصاب و التحرش و هايكبروها و ينشروها علشان يخلوا الست تعمل اللي هما عايزينه..تلبس اللي هما عايزينه.. تمشي في مكان ما هم عايزين و تبقي محتاجلهم.

راجل الدين ده في اي ديانة بيغذي شعور الرجالة اللي بيبعلهم انهم احسن من الستات.. ودي حاجة بترضي غرورهم علشان كدة بيشتروا الديانة دي و يبجلوها خصوصا في المواضيع دي..الراجل اللي بيبيع الدين ده سيطر علي عقول الرجالة و بالتالي سيطر علي عقول الستات اللي ورا الرجالة دول اللي هما مسيطرين عليهم و بالتالي هتلاقي في ستات جهلة بيشوفوا ان الراجل اللي مسيطر علي عقول رجالتهم دول شخص عظيم و صب و سيكسي و بيبقي فتي\شيخ احلامهم و طبعا كله بالدين.


من ساعة ما اتولدت من 21 سنة و ابتديت استوعب و احنا بنسمع عن الخلايا الشمسية..الطاقة المتجددة و مشكلة الطاقة و لحد دلوقتي مفيش حل..واقفين عند نفس النقطة...مفيش بلد لحد دلوقتي بتستخدم طاقات متجددة بالكامل..لو في حل او طريقة يبقي العالم كله هايتقلب..البترول مش هايبقي ليه لازمة..مفيش بلد هاتبقي اقوي من بلد بالبترول او بالفلوس اللي ورا البترول...مع ان في شركات كتير و ناس كتير وصلت لابحاث و طرق خلت الخلايا الشمسية تحول طاقة اكتر..تعيش فترة اطول..ماتبقاش محتاجة لاشعة شمس عامودية...ممكن بسهولة نحول علي نطاق واسع يخلينا مانحتجش للبترول او اي مصدر طاقة غير متجدد. بس الناس اللي شغالة في المحاجة بتطلع فحم..او في الابيار علشان تتطلع بترول.. و العقود و الحقوق و دول الخليج و امريكا و ميزان القوة و و و و كله ماينفعش يخلي حاجة زي دي تتحقق.


الثقافة اللي خلتنا عبيد..بنعمل نفس الحاجة جيل ورا جيل...بنفكر بنفس الطريقة و اي حد بيفكر بطريقة مختلفة يبقي مجنون. باختلاف الطرق العالم كله واحد...تتولد مطلوب منك حاجات تعملها..مدرسة..كلية..شغل..جواز..خلفة..مدرسة..كلية..شغل..جواز..خلفة... و طبعا كله تحت مسمي الحياة..الدين.

اللي فاكر نفسه حر مش حر..اللي عارف انه مش حر هو اللي حر..الحرية في المعرفة و حرية العقل اكبر و اوسع من الحرية بمعناها اللي اتولد مع ثقافة العبيد في العصور القديمة. الناس اللي بتخترع علشان تطلع حاجة للناس بعيدا عن الفلوس او التحكم او غيره هي الامل. اكتر حاجة بتيجي علي بالي يمكن علشان معرفش غيرها هي الناس بتاعت المصادر المفتوحة...بيعملوا علشان الناس مش علشان فلوس ولا قوة...بيعمل ابحاث علشان الابحاث ذات نفسها مش علشان هاتجيب فلوس او شغلانة في شركة..الناس دي هي الامل لما توصل لحاجة هاتقولنا..لما يوصلوا لطريقة يعالجوا بيها السرطان هايقولولنا..لو اخترعوا مساحة تخزين لا محدودة هايقولولنا.. الناس دي يوم عن يوم بتبان اكتر و مش محتاجين غير اننا نبقي عارفين انهم موجودين.. مش محتاجين غير اننا نفكر شوية و نخرج عن الدايرة اللي احنا جواها.

محتاج ابطل كلام علي الفاضي.

Jun 16, 2013

مرسي اللي هايبيعه اهله و عشيرته. مش بعيد يغتالوه علشان يخلصوا نفسهم.

Jun 14, 2013

Inchworms - Day 13

We are getting some action here.
so, last night I saw one of the inchworms moving like it was digging in the dirt. its not digging as much as it was moving the dirt around creating some kind of room. Today I saw two of them in the early stage of Pupa stage (because they are still moving) in the big jar, and one looks like its getting started in the second, smaller jar.

















the inchworms as its known, don't like the herbs or the plants that don't have woody stem, but they like this one in the pictures and its nice to give them something I don't really want in my garden from time to time.

I read that the pupa stage takes several weeks. I don't know if there is anything I can do to help them to transform faster.. temperature or humidity or something.. I don't know.

Jun 13, 2013


عايز اكتب حاجة بس مش لاقي كلام يتكتب.

كلنا زبالة

كنت بتفرج علي الفيديو ده علشان اول حاجة انه بيتكلم عن التصوير و وثائقي و كمان في السعودية.. المهم الكلام اللي التالي مالوش علاقة بالتصوير خالص.

جملة عابرة في الفيديو..عدد الستات في السعودية اللي معاهم شهادات عالية اكتر من الرجالة..اللي بيعملوا درسات علية برده اكتر.. اللي بيعملوا مشاريع جديدة صغيرة اكتر...

السبب مش فكرة الستات و الرجالة اكتر ما هي الثقافة..الثقافة اللي اديت الراجل الحق في كل شئ لمجرد بس انه راجل و بالتالي بقي كل أمله و هدفه في الحياة انه يثبت ده..يثبت انه راجل..مش محتاج لا تعليم و لا ثقافة ولا انجاز ولا اسم ولا غيره (معادا اسم العيلة طبعا).

الست اللي مقفول عليها و بيعاملوها علي انها اداة جنسية لتفريغ شهوة "الراجل" و برده لازم تكون بتتصرف بشكل معين و تصرفات معينة الاغلب مش علشان فكرة انها بنت و لازم تتصرف كدة لكن علشان تكون تصرفاتها مختلفة عن الراجل فبالتالي نقدر نحدد الراجل..يعني اي حاجة بيعملها الراجل ماينفعش الست تعملها و لازم تعمل عكسها تماما علشان نبين الراجل و نخلي تصرفاته واضحة انها تصرفات رجالة.

الست دي برده اللي مابتلاقيش حاجة تظهر فيها و تعمل شخصيتها المستقلة بيها الا الدراسة.. الحاجة الوحيدة اللي بقت دلوقتي متاحة ليهم علشان العائلات بيحبوا المنظرة بجانب ان الموضوع عامل زي بيع المواشي..البقرة اللي عندها مواصفات زيادة هايشتريها واحد بفلوس اكتر.. بغض النظر هو هايعمل بيها ايه.. المهم انه هايقدر السعر.

الدراسة بتبقي الحاجة الوحيدة اللي اللي بيقدروا يعملوها و ينجحوا فيها بعيدا عن التسلط مع ان التسلط موجود برده في اختيار الدراسة اللي تنفع للبنت و اللي ماتنفعش.

الثقافة دي اللي بتخلي الست تشتغل و تتعب و تحارب كل يوم علشان تعمل حاجات بتحبها علشان في الاخر الراجل يجي يشتري و يمشي..مش بترفع من قيمة الراجل بالعكس..زي ما خلت الست بقرة خلت الراجل برده ثور..الاتنين ماينفعش نقول عليهم بني أدم.


الكلام ده كله مش موجه بس للسعودية...العالم العربي كله عنده نفس الفرشة الاساسية مهما اتفرش فوقيها حاجات تانية تغير شكله..الفرشة دي اللي لما حد مختلف بيجي يفكر او يتكلم يقولوا له ان دي ثقافتنا و عادتنا ولازم نتمسك بيها..و بيبقي ردي في الحالات دي "كنا فضلنا نعبد الاصنام برده علشان ثقافة و عادات"...الفرشة دي اللي مهما حاولنا نغيرها او نبين اننا مختلفين و مش عندنا الا ان هي عندنا برده بس بتظهر في مناسبات أقل من العادي... و ده بيخلينا منافقين زيادة.

كعالم عربي...احنا معندناش رجالة احسن ولا ستات احسن..كلنا زبالة.


Jun 10, 2013

التصوير




هو انا بصور ليه؟ او ليه بحب التصوير؟ مش قادر فعلا افتكر ليه اهتميت بالتصوير.. يمكن علشان اهتميت بالديزاين او الجرافكس فكان ده التطور الطبيعي؟ ولا علشان بحب الرسم لكن مابعرفش ارسم فالتصوير اسهل؟ مش فاكر بصراحة.

اول ما كنت مهتم بالتصوير حوالي 2006 - 2007 مكنش التصوير منتشر زي دلوقتي. كان قليل اوي اللي معاه كاميرا DSLR او حتي SLR و كان الكومباكت و البوينت اند شوت يعتبر غالي كمان. زي ما بعمل في اي حاجة مش قادر اجيبها او اعملها فضلت اقرأ و ادور علي النت و اقرأ كتب و نظريات و اساسيات و اتفرج علي ناس بتصور الي اخره.

سافرت و اول حاجة جبتها كانت كاميرا..بوينت اند شوت. لو كنت استنيت شوية كان ممكن اكمل و اجيب DSLR بس كنت مستعجل علشان عايز اوثق كل حاجة من اول يوم. فكرة ان اللي بيعرف يصور بيصور باي حاجة فكرة مش مظبوطة.. اللي بيعرف يصور ممكن يطلع حاجة كويسة واحدة من اي حاجة..تكوين, فكرة, زاوية...لكن انك تبقي معاك كاميرا بتفكر بدالك و عايزة تطلع الصورة مظبوطة من وجهة نظرها حاجة بتضايق اي حد فاهم تصوير و مش مجرد بيصور اوتو. بس كانت مقضية الغرض منها.

فكرة انك تروح مثلا بيست باي و تمسك كاميرا في ايدك و بعدين تسيبها و تمشي حاجة مؤلمة. و هوب فجأة بقت الـDSLR بتصور فيديو و الـD90 كانت قلبان ساعتها.

الترم التاني جاتلي الفرصة اني اروح حاجة اسمها KCC او King Career Center و اخد كورس تصوير. KCC ده تبع المدرسة و الكورسات فيه بتديلك كريدت برده. الترم الاول كنت خلصت تقريبا الحاجات اللي لازم اخدها و كان الترم التاني براحتي..كنت بروح المدرسة اللي كانت بعيدة عن ما كنت قاعد (كلام كتير و دوشة بس المفروض اني كنت ابقي في مدرسة تاني اقرب بس ما علينا) استني الاتوبيس و بعدين تقريبا ساعة او ساعة الا ربع و اوصل KCC و بعدين اخلص ارجع المدرسة في وقت الغدا و احضر الباقي و بعدين اركب الاتوبيس تاني و ارجع علي KCC لكورس التصوير. المهم في كل ده ان يومي كان بيتمحور حول قبل الكورس و اثناء الكورس و بعد الكورس. طول اليوم قبل الكورس انا بحاول افكر هاعمل ايه النهاردة..وقت الكورس بعمل. بعد الكورس انا بدور علي فيديوهات اتعلم منها التصوير بشكل عام.

Dean Paulson غالبا اعظم و اكتر واحد أثر فيا بخصوص موضوع التصوير ده. من النوع اللي مابيبخلش عليك في اي معلومة او اي طريقة او اي معدات ممكن تحتاجها او تعوزها او تستخدمها. تقريبا كل مرة بمسك فيها كاميرا بعمل نفس الحاجات اللي كان قايلنا عليها و بفتكره..فورمات الميموري كارد..الوايت بالانس..و الايزو...فاكر الاعدادات اللي كاتبهلنا علي الحيطة..فاكره و هو بيقلد مراته بضحك و بيقول "Give me the money sucker". فاكر اول يوم و اول صورة هو صورها و هو بيشرحلنا و كانت صورتي.


و كانت اول حاجة عملت عليها ايديت تقريبا :D


و اول صورة انا صورتها هناك..مش هاقدر انسي الفترة دي ابدا.. ولا الناس اللي كانت معايا.



المهم...نرجع للموضوع اللي نسيته اصلا..انا بصور ليه؟ 
اول ما ابتديت اصور كنت اي حاجة بصورها برفعها علي البيج علي الفيسبوك و ابقي مستني الناس تصفقلي..و مايحصلش.. و ازعل و اتضايق. و فضلت كدة فترة لحد ما قررت ان فكرة البيج بالنسبة لي مش صح. انا مش فنان علشان يبقي ليا فانز. مازلت برفع الصور علي الفيسبوك علي البروفايل بتاعي و برده ببقي مستني الناس تصفقلي شوية لاني هابقي بكدب لو قلت ان الموضوع مش مهم. مش محتاج تصقيف بس..محتاج اهتمام..نقد..محتاج اي حاجة..او حاجة معينة يمكن و انا مش عارفها...كالعادة.


لو حسبنا الموضوع هواية..حاجة بستمتع بيها.. فانا فعلا ببقي فرحان و انا بصور.. صوت الشاتر اصلا موسيقي. الصورة علي شاشة الكاميرا ليها طعم تاني. بس و بعدين؟ سؤال رخم مالوش اجابة بس في دماغي..استمتعت كام دقيقة..ساعة.. يوم و بعدين ارفع صورة الناس اللي بتجامل تجامل علي طول و خلاص. مهم اني لما اشوف حاجة بعيني و افكر في فكرة اوثقها بيها.. صورة اصورها زي مانا شايفها او عايز اشوفها..ان يشاركني اللحظة دي ناس تانية..اني اصور صورة تنقل حاجة معينة للناس التانية..مشاعر, تفكير, فعل.

العلوقية كمان مشكلة. العلوقية بسبب و من غير سبب مشكلة كبيرة. الفلوس, الهدف, العلوقية, الصحبة, التقدير, الاسم, البلد, الثقافة, التخلف, القوانين....كلام كتير, دوشة مالهاش لازمة. كلام لا هايفيد و لا هايقدم. كلام.









UA-37864249-1