Aug 31, 2013

عارف لما تكون بتعمل حاجة انت عارف ان مالهاش اي لازمة بس معندكش حاجة تانية احسن تعملها؟ حاجة من جواك تقعد تقولك مالهاش لازمة...و بعدين؟ فكك..و انت ترد هاخسر ايه يعني اديني بلعب...اديني بلعب.


Aug 23, 2013

أدم, حواء, و إبليس

"فأكلا منها فبدت لهما سوآتهما وطفقا يخصفان عليهما من ورق الجنة وعصى"

هي ايه المشكلة ان اتنين متجوزين يشوفوا بعض عريانين؟ و عرفوا منين اصلا انهم عريانين..او عرفوا منين ايه اللي "عورة" و ايه اللي مش عورة؟ طيب هو إبليس دخل الجنة ازاي علشان يوسوس ليهم بعد مارفض انه يسجد لأدم؟

"وَإِذْ قَالَ رَبُّكَ لِلْمَلاَئِكَةِ إِنِّي جَاعِلٌ فِي الأَرْضِ خَلِيفَةً قَالُواْ أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاء وَنَحْنُ نُسَبِّحُ بِحَمْدِكَ وَنُقَدِّسُ لَكَ قَالَ إِنِّي أَعْلَمُ مَا لاَ تَعْلَمُونَ"

يعني أدم و ذريته كان مكتوب عليهم انهم يعيشوا في الارض مش في الجنة و مع ذلك سكنوا الجنة و نزلوا الارض بس لما إبليس وسوسلهم بانهم يأكلوا من الشجرة اللي ربنا نهاهم عنها...يعني لو كان ابليس سجد لأدم في الاول كان أدم و حوا ماخرجوش من الجنة؟ ده طبعا غير ان أدم ماسمعش كلام ربنا و عصاه بشئ من السهولة و كان برده طماع و ساب الجنة كلها و ركز في الشجرة دي و برده فكرة ان الممنوع مرغوب و الجو ده...يعني في النهاية كان لازم أدم يعصي الله علشان يخرج من الجنة.. و في نفس الوقت إبليس لو مكنش عمل اللي عمله مكنش بقي في خليفة في الارض؟

الفكرة التانية في جزئية "أتجعل فيها من يفسد فيها و يسفك الدماء" و هي جزئية قريت قريب نظرية ان أدم مكنش اول البشر و ان كان في اشباه البشر من قبل أدم وكانوا بدائيين و ان أدم هو اول البشر بالمنظور المتطور بغض النظر عن نظرية التطور او الخلق.

https://www.youtube.com/watch?v=ROwKq3kxPEA

او لو فكرنا في الكلام بشكل تاني هنلاقي ان المعني ان الارض مافيهاش حياة و الملائكة شايفة ان اي حد هايبقي في الارض هايبقي فاسد و يسفك الدماء...لو كان فيها اصلا من يفسد و يسفك الدماء يبقي هاتفرق معاهم ايه ان يبقي في حد تاني؟ في نفس الوقت الخليفة هو اللي بيخلف او بيجي بعد حد..ولا خليفة بمعني انه يعدل ما بين الناس و ينشر كلام الله في الارض؟ طب الخليفة كان أدم بس ولا أدم و ذريته؟ لما بدور علي الانترنت بلاقي ان اغلب التفسيرات تفسيرات مبنية علي خيال اللي بيفسر...بيكمل النقط الفاضية دي بمزاجه...بيقولوا ان اللي سبق أدم علي الارض كانوا الجن..طب الجن دول اللي سفكوا و افسدوا في الارض راحوا فين دلوقتي؟ بيتحاسبوا طيب؟ طب ربنا بعتلهم نبي او رسل علشان يعرفوا ايه الصح و ايه الغلط؟ طب هما افسدوا و سفكوا الدماء ليه؟ كان محتاجين ايه ولا عايزين ايه من بعض؟ تفسيرات بتقول انهم اتنفوا للبحر..طب و دي حاجة وحشة ليهم يعني؟ بيحبوا الارض الناشفة يعني؟ طيب هو كلمة "الارض" مقصود بيها الكوكب ولا الارض عكس البحر؟ ما يمكن كان في خليفة علي كوكب تاني و هو و ذريته اللي افسدوا و سفكوا الدماء علشان كدة الملائكة قالوا ان الخليفة اللي هايبقي في الارض هايبقي نفس النظام؟

الجزء التاني من الاية ايه الغرض منه؟ الملائكة بتغيير؟ عايزة تبين انها احسن؟ يعني الفرق بينها و بين إبليس ان هو ثبت علي موقفه و معملش حاجة مش مقتنع بيها؟ ايه معني الجزء ده من الاية؟

"وإذ قلنا للملائكة اسجدوا لآدم فسجدوا إلا إبليس أبى واستكبر وكان من الكافرين"
يعني إبليس ملاك؟ طيب "الكافرين" هنا بتعود علي الكفر بايه بالضبط؟ الكفر بالله؟ صعب لان إبليس بيعبد الله و مؤمن...الكفر بأدم؟ الكفر بأن أدم خليفة في الارض؟ الكفر بانه يسجد لحد غير ربنا؟ الكفر بأنه يسجد لمخلوق من تراب او طين و هو مخلوق من نار؟ و لو هو مخلوق من نار اذا هو مش ملاك و هو جن؟
" ولقد خلقناكم ثم صورناكم ثم قلنا للملائكة اسجدوا لآدم فسجدوا إلا إبليس لم يكن من الساجدين"
" وإذ قلنا للملائكة اسجدوا لآدم فسجدوا إلا إبليس كان من الجن ففسق عن أمر ربه أفتتخذونه وذريته أولياء من دوني وهم لكم عدو بئس للظالمين بدلا"
يعني ملاك ولا جن؟ و هل كونه من الجن هو السبب انه وحش يعني و عصي الامر؟ ولا علشان عصي ورفض السجود بقي من الجن؟




"إبليس أراد أن يدخل ليوسوس ( إلى ) آدم وحواء فمنعته الخزنة فأتى الحية وكانت صديقة لإبليس وكانت من أحسن الدواب لها أربع قوائم كقوائم البعير وكانت من خزان الجنة فسألها إبليس أن تدخله فمها فأدخلته ومرت به على الخزنة وهم لا يعلمون فأدخلته الجنة وقال الحسن : إنما رآهما على باب الجنة لأنهما كانا يخرجان منها وقد كان آدم حين دخل الجنة ورأى ما فيها من النعيم قال لو أن خلدا فاغتنم ذلك منه الشيطان فأتاه الشيطان من قبل الخلد فلما دخل الجنة وقف بين يدي آدم وحواء وهما لا يعلمان أنه إبليس فبكى وناح نياحة أحزنتهما وهو أول من ناح فقالا له ما يبكيك ؟ قال أبكي عليكما تموتان فتفارقان ما أنتما فيه من النعمة . فوقع ذلك في أنفسهما فاغتما ومضى إبليس ثم أتاهما بعد ذلك وقال يا آدم هل أدلك على شجرة الخلد فأبى أن يقبل منه وقاسمهما بالله إنه لهما لمن الناصحين فاغترا وما ظنا أن أحدا يحلف بالله كاذبا فبادرت حواء إلى أكل الشجرة ثم ناولت آدم حتى أكلها"
علي افتراض ان الكلام اللي فوق ده صحيح...معني كدة ان إبليس فضل برده قريب من الجنة...و بالرغم من انه عصي ربنا بس برده "الحية" -مهما كانت- و هي من خزانة الجنة بتكلمه و صديقة و ساعدته علي انه يدخل الجنة..و اذا كان الله منعه من دخول الجنة..ازاي بسهولة دخل؟ و في بعض التفسيرات برده ان "اهبطوا" كانت عايدة علي أدم و حواء و إبليس و الحية...و بالرغم ان مفيش اي حاجة تثبت الكلام ده في القرأن اﻻ ان نفس التفسيرات دي بتفسر ان حواء هي اللي اثرت علي أدم و كانت السبب انه "يقرب" للشجرة.


الجزء التاني فكرة ان علي الارض كان أدم و حواء..خلفوا..طيب اللي خلفهوم دول اتجوزوا مين؟ اتجوزوا بعض؟ و لو لا امال اتجوزوا مين؟

و انا بدور لاقيت في احد التفسيرات ان ربنا بعتلهم جن و حور عين من الجنة علشان يتجوزوهم...طيب ازاي؟ و لو كدة يبقي احنا في اصل من الجن؟ و علي كدة بقي ممكن نتجوز الجن؟ ماهو في كلتا الحالتين الموضوع مش مفهوم و مش مظبوط. و علي افتراض ان موضوع الجن ده حقيقي...اللي بيتولد بيبقي جن و لا انس؟ طين ولا نار؟

لما ايدي اتكسرت...اول حاجة جت في بالي اول ما شوفتها


Aug 16, 2013

يوم صيفي قديم بقي تقريبا انتيكة اثرية...حر بس في نفس الوقت هوا ساقع...الناس كلها مأنتخة بس من غير دوشة...من غير انوار كتير..من غير تليفيزيون عالي ولا زعيق ولا كلام في موبايلات بصوت عالي...مفيش مكن صيني رايح جاي ولا فيزب بتاعت توصيل الطلبات..مفيش خناقات ولا زعيق...كان في شباب بيضربوا مخدرات بس كانوا بيدوروا علي مكان فاضي..ضلمة و يقفوا من غير صوت علشان محدش يشوفهم...الشارع كان متغطي بالشجر و مفيش عمدان نور...مكنش متسفلت اصلا...مفيش دخان كتير الهوا لسة نضيف.

الساعة 11 بليل..الشقة كلها ضلمة علشان الشبابيك كلها مفتوحة...الشبابيك كلها بلا استثناء...كرسيين في البلكونة قاعد عليهم اتنين بيتكلموا بصوت واطي...لولا نار السيجارة اللي بتتوهج كل شوية مكنتش تشوفهم. مفيش سيراميك...كله بلاط..البلاط ليه ملمس مختلف بتحس بيه خصوصا لما بتتحرك من بلاط لمنطقة مفروشة بالموكيت...البلاط بيبقي متغطي بكذا سجادة صغيرة من جميع الاشكال و الالوان و ده بيديك فرصة انك تلعب سوبر ماريو و تنظ من سجادة للتانية و انت ماشي....و غالبا هاتنط مرة غلط علي طرف سجادة و هاتاخدك و تقع...مرة اتنين..ماتعدش.

الحياة بسيطة مفيش ماديات كتير...مفيش الصالون المدهب ولا ادمان الفازات و التحف...مفيش غير اتنين انتريه...واحد قديم و التاني اجدد. القديم بيبقي مكان استراتيجي ممكن تخبي فيه اي حاجة...و بينفع برده لما تكون فرحان بنفسك و بتعمل تمارين بطن و محتاج تدفس رجلك تحتيه علشان ماتترفعش. اما الجديد فكان لكل شخص مكانه المفضل...لو حد غريب قعد في حتة غلط..القعدة بتبقي متكهربة...من كل الهوا اللي داخل بيخلي القماشة بتاعته تبقي ساقعة...بتلاقي نفس بتحس بمتعة طفولية لما تقعد علي اي كرسي فيهم...خصوصا لو انت حجمك صغير نسبيا بالنسبة للكرسي فيحتويك جواه.

كان بيبقي في لب..ساعات بطيخ او عنب...اي حاجة علشان التسلية. في بخور متولع في كذا ركن مع موسيقي خفيفة من هاي فاي سوني مستورد كان علاقته بسرايفوا زي علاقة المروحة و الخلاط بليبيا..او الكويت. ثريلر نايت, ساتر داي نايت فيفر, ستاينج الايف, موسيقي ارتبطت بالصيف..بنسمة هوا باردة...بريحة البخور و طعم البطيخ و ملمس البلاط تحت رجليك مع وجع "العصعوصة" بسبب الوقوع. 

Aug 11, 2013

Ubuntu

الموضوع ده غالبا مشترك عند الجميع..غالبا.

اول ما عرفت و نزلت ابونتو كنت مبهور جدا بالشكل و بالحاجات اللي ممكن اعملها تغير الشكل و تعمل حركات. الكلام ده بيزيد كل ما بتتعلم اكتر لحد ما يوصل لنقطة مايبقاش الكلام ده فارق معاك اوي..تبقي عايز حاجة هادية شكلها بسيط بس في نفس الوقت حلو..تبتدي تركز علي حاجات اهم من الشكل بس الشكل بيفضل برده حاجة مهمة...بس مش ملفتة زي الاول.























ابونتو من الحاجات المميزة اللي قابلتها في حياتي و اللي كان ليها دور انها تلفت نظري لحاجات تانية كتير وراها.








هبة طوجي في يوم شتا و الدنيا برد..يوم اجازة..الساعة 9 الصبح تركب الـCTA من الهرم لميدان الحجاز و بالعكس.

Aug 9, 2013

بشغل التليفيزيون علي اي فيلم..او مسلسل....بشغل موسيقي او اغاني و البس الهيدفون....افتح 20 تاب علي كروم و افضل قاعد..متنح للتليفيزيون بقرأ الترجمة لفيلم انا عارفه..شفته مش أقل من 3 مرات...موسيقي شغالة معظمها شبه بعضه علشان مش عارف اوصل لجديد.

بتفرج علي التليفيزيون و سامع الموسيقي..لكن مش مركز مع اي حاجة...بفكر بس غالبا بفكر في التفكير ذات نفسه...حالة بتبقي الدنيا فيها زحمة لدرجة اني مش شايف ولا سامع و لا فاهم حاجة.


اي علاقة بتبقي قايمة علي المصالح...حد عايز حاجة من حد و الحد ده عايز حاجة منه بالمقابل بتبتدي تبقي في علاقة..اللي يقول غير كدة يبقي واهم بالنسبة لي...كلها مصالح. في الفترة الاخيرة اكتشفت ان 99% من اللي بيكلمني بيكلمني بس علشان المصلحة بس..علشان اللي هو عايزه و بس. و الباقي 1% عارفني علشان مصلحة بس في نفس الوقت بيكلمني او بيشوفني ساعات من غير ما يبقي عايز حاجة.

الموبايل عندي مفيهوش نمر اي حد من القرايب..مفيش عيلة..مفيش غير نمرة خالة واحدة..وجوزها و ولادها..اللي في الغالب مابتصلش بيهم غير كل فين و فين في مناسبة و بتبقي مكالمة واحدة بس لخالتي..ان كانت.
حتي المصلحة اللي جايا من ورايا..مصلحة تافهة..ماديات حقيرة من ورا شخص وسخ.


اكتشفت مؤخرا اني بولول كتير...بس اديني بولول في الدرا..مش بوجع دماغ حد...ولا مستني من حد يرد عليا.

Aug 2, 2013

من كام سنة كنت دايما لما بفكر في حاجة عايزها بس مش معايا كنت بوهم نفسي اني "لما اكبر هاعملها"...لما اكبر هايبقي معايا عربية..هاسافر براحتي مكان ما انا عايز وقت ما انا عايز...الفكرة هنا ان لما بقول الجملة دي بيبقي في سن معين في دماغي..السن ده بوصله بسرعة.. فابتدي اكرر نفس الجملة بس بسن تاني اكبر شوية..وهكذا.

لو عشت حياتي بشكل طبيعي و مت بشكل طبيعي لما اعجز..خايف اني قبل ما اموت بشوية افكر في كل الحاجات دي اللي قلت لما اكبر هاعملها او هاوصلها.
UA-37864249-1