Mar 27, 2014

اخلاق للبيع

حبيت اني ادور شوية و اكتب اللي بيدور في دماغي من النقطة دي علشان بتبقي دائما نقطة في نقاش عن اي حاجة بتظهر كلمة "الاخلاق" و مابقاش فيه "اخلاق" و لو "الاخلاق" رجعت كل حاجة هاتبقي تمام.

الأخلاق هي شكل من أشكال الوعي الإنساني كما تعتبر مجموعة من القيم والمبادئ تحرك الأشخاص والشعوب كالعدل والحرية والمساواة بحيث ترتقي إلى درجة أن تصبح مرجعية ثقافية لتلك الشعوب لتكون سنداً قانونياً تستقي منه الدول الأنظمة والقوانين.[1] وهي السجايا والطباع والأحوال الباطنة التي تُدرك بالبصيرة والغريزة، وبالعكس يمكن اعتبار الخلق الحسن من أعمال القلوب وصفاته. وأعمال القلوب تختص بعمل القلب بينما الخلق يكون قلبياً ويكون في الظاهر.
ويعتبر الدين بشكل عام سندا للأخلاق، والأخلاق هي دراسة، حيث يقيم السلوك الإنساني على ضوء القواعد الأخلاقية التي تضع معايير للسلوك، يضعها الإنسان لنفسه أو يعتبرها التزامات وواجبات تتم بداخلها أعماله أو هي محاولة لإزالة البعد المعنوي لعلم الأخلاق، وجعله عنصرا مكيفا، أي أن الأخلاق هي محاولة التطبيق العلمي، والواقعي للمعاني التي يديرها علم الأخلاق بصفة نظرية، ومجردة". والكلمة الإنكليزية للأخلاق «Ethic» مستخلصة من الجدار اليوناني «ἤθεα» (إيثيه) أي «عادة». وتكون الأخلاق طقما من المعتقدات، أو المثاليات الموجهة، والتي تتخلل الفرد أو مجموعة من الناس في المجتمع.
والديونتولوجيا - من الجذر اليوناني «δέον» (ديون) أي «ما يجب فعله» و«λογία» (لوغيا) أي «العلم» - أو علم الواجبات مفهوم يستخدم كمرادف للأخلاق المهنية، فيختصّ هذا المجال بالواجبات ويحكم على الفعل راجعاً إلى القواعد والقوانين.
مقتبس من ويكيبيديا


علشان اعرف اشرح اللي في دماغي بصورة بسيطة خلونا نشيل الدين من المعادلة (اغلبية الاديان كلها بتدعوا اننا نتعامل مع بعض بطريقة حلوة معادا الكافريين الوحشين ليهم طريقة معينة و الطريقة دي بتختلف من دين الي اخر و من تفسير الي تفسير و من جماعة الي جماعة اخري) .

الموضوع بشكل كبير مرتبط بالبوست اللي كتبته قبل ده عن التحرش... و النقطة اللي معظمنا بيفكر فيها ان لو واحد عنده اخلاق مش هايتحرش. بس الاخلاق دي شئ نسبي زي ما كل حاجة بشكل او باخر نسبية في الانسان. مفيش حاجة اسمها واحد عنده "اخلاق" لان الاخلاق مش حاجة معينة و مش معروفة. و مفيش حاجة اسمها واحد عنده "اخلاق" وحشة لان الوحش بالنسبة لك ممكن يبقي حلو بالنسبة لغيرك. انا مش شايف ان ينفع اننا نجمع و نوصف الشخص بكلمة او كلمتين...ماينفعش.

لو رجعنا للموضوع الاساسي...التحرش...فممكن شخص يكون بيكدب بس مابيتحرش لا بواحدة بالمفهوم الجنسي الشائع ولا بواحد. عنده اخلاق؟ حط لنفسه قيم معينة و مبادئ معينة انه شايف ان الكدب عادي بس التحرش لا.
ممكن جدا يكون الواحد ده كل يوم بليل بيجيب واحدة عنده في الشقة ينام معاها...بس مابيتحرش بالشكل المعروف في مصر لانه شايف ان تعدي علي حقوق الاخريين و مش من حقه.


القيم و المبادئ دي مكتسبة من حاجات كتير...من الدين, من التاريخ العام للمنطقة...من ثقافة البلد و عاداتها و تقاليدها الي القانون و هنا بيبقي في علاقة بين الاخلاق دي و القانون لان الاتنين بيأثروا في بعض بشكل كبير...القانون ساعات يجبر قيمة معينة انها تكون موجودة او مش موجودة و ممكن العكس...ده بيرجع لقيمة اقدم و هي نظرة الناس للقانون في المكان الفلاني.

من رأيي ان مفيش حاجة اسمها لو في "اخلاق" مش هايبقي في تحرش....الاصح ان لو في قيمة او مبدأ او وعي ان الانسان مايتعداش علي انسان تاني بأي شكل من الاشكال و يبقي في قانون قوي يمنع ده...ساعتها مش هايبقي في تحرش بشكل كبير..لا تحرش جنسي ولا من اي نوع تاني.

Mar 25, 2014

التحرش و انا!

امبارح و انا راجع في "الميكروباظ" كان في برنامج ما شغال علي محطة ما علي الراديو و كانوا بيتكلموا عن التحرش و ان مصر من أسوأ البلاد العربية و العالمية ان المرأة تعيش فيها. 
اتصل واحد و اتكلم ان حادة تحرش حصلت قدامه  من مجموعة شباب لبنتين و هو اتدخل و الشباب سابوا البنات و مسكوه هو "شاهرين" اسلحة بيضاء.

و اتصال اخر من شخص كان بيتصل بس علشان يتكلم في مشكلة تانية خالص خاصة بيه بس علشان برده يبقي عمل اللي عليه اتلكم شوية عن الموضوع و ان ازاي المدرسة و التربية و التعليم و من قبلهم البيت ليهم دور في تحسين الاخلاص و التربية و طبعا الدين و لان الاخلاق مابقتش موجودة الخ... و ان و هو صغير كان مفهوم ان الولد مايعكسش "بنت الحت" (بس تقريبا كان ممكن يعاكس بنات حتت تانية).

و مع اختلاف الحلول و الكلام اللي المذيعة و المذيع بيتكلموا فيه الي الناس المبالغ فيها اللي بتتصل و اللي في الاخر حاصرين الحوار في الاخلاق و الدين و البنت تلبس ايه و تروح فين و ماتروحش فين الي العقوبات الرادعة اللازمة لمواجهة التحرش.



انا معرفش انا اللي بفكر غلط ولا يمكن مش فاهم الموضوع...بس بالنسبة لي الموضوع مالوش علاقة لا بالاخلاق ولا بالدين و لا بالبنات اصلا..طول ما مفيش ثقافة اني ماليش دعوة باللي حواليا يبقي المشكلة هاتبقي موجودة باي شكل...فكرة ان انا اعتدي علي حد هي المشكلة..اعتدي عليه فكريا, صوتيا, جسديا, او جنسيا هي المشكلة. مش مشكلة بنات و تحرش و بس..التحرش ظاهر بس لان في مجتمعنا الشرقي المتدين العظيم البنت او المرأة هي الكائن الاضعف تقريبا في نفس مستوي الحيوانات..ثقافة فكرية اتزرعت جوانا من اهالينا لحد دلوقتي بيزرعها الاهل في الاولاد و البنات تحت مسميات كتير...دين, عادات و تقاليد, الخ...الولاد بيعجبهم الموضوع علشان بيبقوا هما احسن من البنات...و البنات يا بيستسلموا و بيوافقوا علي الكلام ده يا بيعيشوا في قرف طول حياتهم تقريبا.


موضوع التحرش ده بيحصل كل يوم في كل مكان و مع تقريبا كل الناس (في مصر) من الشخص اللي شايف نفسه الكائن الاسمي..الاقوي تجاه اي حاجة ادني منه...مكن تكون بنت او ولد مطول شعره او قطة واقفة وسطة الزحمة بتحاول تسد جوعها.

الاخلاق ليها علاقة؟ هي ايه الاخلاق دي اصلا؟ ما اظنش ان الاخلاق ليها اي علاقة بالموضوع...واحد بيعمل اي حاجة غلط بتضر نفسه او المجتمع شايفها غلط مش لازم يكون بيأذي اي حد حواليه..بالعكس ممكن يكون احسن للمجتمع اللي حواليه من اي حد تاني مابيعمش "الغلط" ده.

من كام يوم لما حصلت حادثة التحرش بتاعت الجامعة (التحرش جوة الجمعة موجود كل يوم و بكل الاشكال) كان في واحد كاتب عن نفس اللي قاله اللي اتصل بالبرنامج ده...الفرق انه لما اتدخل..الشباب تحرشوا بيه هو لانه في اللحظة دي بقي قدامهم هو "الاضعف" بس زي ما كل البنات اللي المجتمع شايفهم "الاضعف" و هم اقوي من المجتمع كله...الشاب ده كان برده في ساعتها اقوي من كل اللي تحرشوا بيه. شجاعة انه كمان يتكلم في الموضوع.

الدين ليه علاقة؟ خلينا نقول ان من وجهة نظري الخاصة انا...الدين سبب كبير في المشكلة مش في الحل. الدين اللي احنا فاهمينه او اللي وصلنا او اللي فهمهولنا. و الدين في النهاية مش هايمنع اي حد يعمل كدة...لما تقوم القيامة كل واحد هايبقي يتحاسب..لكن المشكلة هاتفضل موجودة.

البيت؟ التربية و المدارس زي ما بيقولوا؟ يمكن علي مدار اجيال الموضوع يبتدي يقل...بس مش حل في الوقت الراهن...لان البيوت بايظة اصلا زيها زي المدارس.

القانون؟ انهي قانون؟ نعمل قانون علشان التحرش؟ ايه هو التحرش؟ كلمة؟ ولا بصة؟ ولا لمسة؟ طيب السرقة بالاكراه او "التثبيت"؟ ماهو ليه قانون برده و ممنعوش...القانون مابيمنعش لو القانون ضعيف و اللي بينفذه ضعيف. و الداخلية في مصر عاملة زي الشراب المخروم من كل حتة بس الرقبة بتاعته شكلها كويس من فوق قدام الناس...لكن وظيفته الفعلية صفر.


انا مقدرش اتخيل ازاي البنت تعيش في البلد دي....اذا كنا احنا الولاد مش عارفين نعيش بكل المميزات و الافضلية اللي مدهالنا المجتمع كحق زيادة عن البنات. مجتمع مش قادر اصلا يعرف المشكلة ايه و بيحل مشاكل تانية وهمية. المجتمع ده اللي عمره ما هايتغير ابدا لانه مش عايز يتغير و مفيش حد قوي يفرض عليه التغير. هايفضلوا الشواية الكويسين بيحاولوا يبعدوا عن المجتمع ده...و اللي بيتزنق جواه يا بياخد جمب و بيعيش علي مزاجه يا بيعيش علي مزاجه برده بس بمحاربة كل اللي حواليه و التمرد علي كل حاجة اللي في النهاية علي ما اعتقد بتؤدي الي التمرد من اجل التمرد و السلام.

Mar 3, 2014

VW Campers

العربية دي اكبر اهانة ليها انها شغالة علي خط فيصل و الهرم...و في مصر الكل هايشوفها باحتقار "ميكروباظ".....في المستقبل لو معايا فلوس و لسة عندي نفس الاهتمام هاشتري واحدة و احاول ارجعلها قيمتها....وهاتبقي مناسبة اوي اني اسافر حوالين مصر "ده اذا مصر كانت موجودة ساعتها"

سخرية القدر ان العربية دي كانت مشهورة اوي في فترة السيتينات\السبعينات و بين الشباب و "راكبي" الامواج و اللي كان معظمهم (او ده اللي انا فاهمه) بيشربوا حشيش\ماريجوانا\بانجو... و السواقين في مصر بتحافظ علي نفس التقليد.



















































































UA-37864249-1