Oct 3, 2014

العيد

العيد المفروض وقت فرحة و سعادة...بس لا انا مابحبوش.

العيد بيبقي تذكرة بالنسبة لي اني فعلا مابعرفش افرح...الوقت اللي المفروض كله يفرح فيه انا مابعرفش. عمري ما عرفت اعمل حاجة مختلفة فيه بفضل قاعد في البيت و مابعملش حاجة.

مع صحابي بتبقي الوقفة عبارة 90% بنفكر هانعمل ايه و ده بيبقي علي القهوة لحد ما بيبقي مفيش حاجة تتعمل ولا وقت و خلاص علي كدة.

من سنتين او 3 سافرت شرم الشيخ مع اسلام في العيد و يمكن تكون دي المرة الوحيدة اللي استمتعت فيها بالعيد بغض النظر ان لو كنت سافرت في وقت تاني كنت هاتبسط برده و السفرية مالهاش علاقة بالعيد.


العيد اللي فات كان سئ. اهلي سافروا و فضلت الاربع ايام لوحدي قاعد في البيت. اول او تاني يوم اسلام عدي عليا بعد الشغل شوية و خلاص. مكنتش حتي بكلم حد.
طيب ليه ماسافرتش مع اهلي؟ مش هاسافر اسكندرية في العيد في الزحمة و انا حتي مش في حاجة بتاعتنا ممكن ابقي قاعد فيها براحتي...فندق في نادي في الجيش. ده اللي نقدر عليه. مفيش شقة في حتة مفيش شاليه في الساحل...مافيش مكن ممكن اسافرله مع اهلي و ابقي مبسوط او براحتي.

معرفش انا بكتب الكلام ده ليه بس اهو اتكتب و خلاص.
عيد سعيد.
UA-37864249-1